Live Updates

ترکی کے صدر کا وزیراعظم شہباز شریف سے ٹیلیفون پر رابطہ

ترکیہ کابھارت کی جانب سے پاکستان و آزاد کشمیر پر میزائل حملوں کے بعد مکمل یکجہتی کا اظہار بھارت کی جارحیت پر ترکی پاکستان کے ساتھ کھڑا ہے، صدر اردوان

جمعرات 8 مئی 2025 14:02

ترکی کے صدر کا وزیراعظم شہباز شریف سے ٹیلیفون پر رابطہ

اسلام آباد / انقرہ(اُردو پوائنٹ اخبارتازہ ترین - این این آئی۔ 08 مئی2025ء) ترکی کے صدر رجب طیب اردوان نے وزیراعظم شہباز شریف سے ٹیلی فون پر رابطہ کیا اور بھارت کی جانب سے پاکستان اور آزاد کشمیر پر میزائل حملوں کے بعد مکمل یکجہتی کا اظہار کیا۔ترک ایوان صدر کی جانب سے جاری بیان میں کہا گیا کہ صدر اردوان نے پاکستان کی ’’پرامن اور تحمل پر مبنی پالیسیوں‘‘کو سراہا اور یقین دلایا کہ ترکی موجودہ بحران میں پاکستان کے ساتھ ہے۔

(جاری ہے)

وزیراعظم شہباز شریف سے گفتگو میں ترک صدر نی22 اپریل کو مقبوضہ جموں و کشمیر میں ہونے والے حملے کی غیر جانبدار تحقیقات کی پاکستانی تجویز کو ’’مناسب‘‘قرار دیا۔ بھارت نے اس حملے کا الزام پاکستان پر عائد کیا تھا، جس کی پاکستان نے سختی سے تردید کی ہے۔بیان میں کہا گیا کہ صدر اردوان نے اس بات پر زور دیا کہ ترکی خطے میں کشیدگی کو بڑھنے سے روکنے کیلئے ہر ممکن کردار ادا کرنے کیلئے تیار ہے، اور ان کے سفارتی رابطے جاری رہیں گے۔اس سے قبل ترکی نے بھارت کی جانب سے کی گئی فوجی کارروائی کو خطرناک قرار دیتے ہوئے کہا تھا کہ یہ ’’مکمل جنگ‘‘ کا باعث بن سکتی ہے۔