ڈی ڈبلیو 
اسلام آباد (اُردو پوائنٹ ۔ DW اردو۔ 08 مئی 2025ء) دبئی کے امارات گروپ نے اعلان کیا ہے کہ اسے مسلسل تیسرے سال ریکارڈ کاروباری منافع ہوا ہے۔ امارات گروپ کے چیئرمین شیخ احمد بن سعید آل مکتوم نے جمعرات آٹھ مئی کے روز ایک بیان میں کہا، ''ایمریٹس گروپ نے منافع، آمدنی اور نقد اثاثوں کے حوالے سے نئے ریکارڈ قائم کرتے ہوئے معیار مزید بلند کر دیا ہے۔
‘‘اس بیان کے مطابق امارات گروپ نے طیاروں، انفراسٹرکچر اور ٹیکنالوجی میں 3.8 بلین ڈالر کی سرمایہ کاری کی تاکہ وہ ترقی اور کامیابی کے راستوں پر گامزن رہے۔
اسی دوران اس بزنس گروپ کے ملازمین کی تعداد نو فیصد اضافے کے ساتھ اب ایک لاکھ اکیس ہزار سے زائد ہو گئی ہے، جو کہ اس کی تاریخ کی سب سے زیادہ تعداد ہے۔
(جاری ہے)
نئے جہازوں کا انتظار ہے، امارات گروپ
امارات گروپ کی دیگر کاروباری شاخوں کے علاوہ ایمریٹس ایئرلائنز نے 5.8 بلین ڈالر قبل از ٹیکس منافع کمایا، جو گزشتہ سال کے مقابلے میں 20 فیصد زیادہ ہے۔
اب اس گروپ کی آمدنی چھ فیصد اضافے کے ساتھ 34.9 بلین ڈالر تک جا پہنچی ہے۔
متحدہ عرب امارات میں ریاستی ملکیت میں کام کرنے والی امارات ایئر لائن دنیا کی بہترین ہوائی کمپنیوں میں شمار کی جاتی ہے۔
امارات گروپ کے بیان کے مطابق وہ اپنے لیے 314 نئے مسافر طیاروں کی ڈیلیوری کا منتظر ہے، جن میں اکسٹھ A350 اور دو سو پانچ بوئنگ 777 بھی شامل ہیں۔
بتایا گیا ہے کہ یہ بزنس گروپ پانچ بلین ڈالر کی لاگت سے 219 طیاروں کی ریٹروفٹنگ (انہیں جدید ترین سہولیات سے آراستہ کرنے) کا کام بھی کر رہا ہے تاکہ نئے طیاروں کی آمد تک اس گروپ کے کاروبار اور خدمات کے اعلیٰ معیار کو قائم رکھا جا سکے۔
ادارت: مقبول ملک
