پاکستان کی مسلح افواج نے بھارتی جیٹ اور یواے ویز کو گرایا جو ان کو ہضم نہیں ہوسکا

اسلام آباد ( اردوپوائنٹ اخبار تازہ ترین۔ آئی پی اے ۔ 08 مئی 2025ء ) نائب وزیراعظم ، وزیرخارجہ پاکستان اسحاق ڈار نے کہا ہے کہ پاکستان کی مسلح افواج نے بھارتی جیٹ اور یواے ویز کو گرایا جو ان کو ہضم نہیں ہوسکا،انڈیا نے جھوٹی کہانی بنائی کہ پاکستان نے رات کوحملے کئے۔انہوں نے ڈی جی آئی ایس پی آر لیفٹیننٹ جنرل احمد شریف چوہدری کے ہمراہ میڈیا بریفنگ میں بتایا کہ بھارت پاکستان کی خودمختاری اور عالمی قوانین کی خلاف ورزی کررہا ہے۔

پاکستان نے اپنی حدود میں داخل ہونے والے بھارتی ڈرونز کو مار گرایا ہے۔ پاکستان اپنے شہریوں کے تحفظ کیلئے پرعزم ہے، بھارت پاکستان میں شہری آبادی کو نشانہ بنارہا ہے۔ انڈیا نے جھوٹی کہانی بنائی کہ پاکستان نے رات بھارت میں حملے کئے ان کے بدلے میں ڈرونز حملے کئے ہیں، انڈیا کو شرم آنی چاہئے کہ جھوٹ کی بنیاد پر آج ڈرونزحملے کئے ۔

(جاری ہے)

پاکستان بھارتی پنجاب میں شہریوں کو نشانہ بنانے کی تردید کرتا ہے۔

بھارتی ڈرونز نے کھلاڑیوں کو ٹارگٹ کرنے کی کوشش کی۔ پاکستان نے ذمہ داری کے ساتھ دفاعی حق استعمال کیا۔ انہوں نے کہا کہ بھارت نے جب حملہ کیا تو پاکستان نے 6 اور 7 کی درمیان شب بھارت کے 75 سے 80 لڑاکا جیٹ طیاروں کا مقابلہ کیا جس میں پاک فضائیہ نے 5 طیارے مار گرائے، پاکستان کی تینوں مسلح افواج ، بری ، فضائیہ اور نیوی الرٹ ہیں۔بھارت کوئی ایڈونچر کرے گا تو اس کو منہ کی کھانا پڑے گی۔

مزید برآں ترجمان پاک فوج کی بھارت پر حملہ کرنے کی تردید، کہا بھارت کے 15 مقامات پر پاکستانی حملوں کی بھارتی خبر جھوٹ کا پلندہ ہے، پاکستان حملہ کرے گا تو پوری دنیا کو نظر بھی آئے گا۔ تفصیلات کے مطابق جمعرات کی شام کو نائب وزیراعظم اسحاق ڈار کے ساتھ نیوز کانفرنس کرتے ہوئے ڈی جی آئی ایس پی آر لیفٹیننٹ جنرل احمد شریف چودھری نے کہا کہ امرتسر میں بھارتی فوج نے خود اپنی تنصیبات کو نشانہ بنایا، آدم پور سے پروجیکٹائل خود انہوں نے فائر کیے۔

لیفٹیننٹ جنرل احمد شریف چودھری نے کہا کہ بھارت کا 15 مقامات پر حملے کا الزام مضحکہ خیز ہے، بھارت کہتا ہے پاکستان نے اس پر میزائل داغے، جہاں یہ میزائل گرے وہاں خشک گھاس پڑی ہے، کم از کم اس میں آگ ہی لگا دیتے، انہوں نے کہا کہ آخر کب بھارت اپنے سینما کی فلمی دنیا سے نکل کر حقیقی دنیا میں آئےگا؟ پاکستان بھارت سے آنے والی ہر شے کو مانیٹر کر رہا ہے، گرائے جانے والے بھارتی ڈرونز کا فرانزک معائنہ کیا جا رہا ہے۔

ڈی جی آئی ایس پی آر نے کہا کہ آج بھارت کے ٹوٹل 29 ڈرونز گرائے گئے، جن میں سے صرف ایک اپنے ٹارگٹ کو نشانہ بنا سکا، جس میں کچھ آلات کو نقصان پہنچا، ڈرون حملوں میں 3 افراد کی شہادتیں ہوئیں، 4 فوجی جوان زخمی ہوئے۔ لیفٹیننٹ جنرل احمد شریف چودھری نے کہا کہ بھارت ڈراموں کے ذریعے مذموم مقاصد حاصل کرنا چاہتا ہے، 2019 میں انہوں نے چائے یہاں آکر پی تھی اس بار ہم نے چائے وہاں بھجوائی، پاکستانی قوم ڈرنے والی نہیں ہے۔