بھارتی جارحیت کا منہ توڑ جواب دیکر پاک فوج نے پھر ثابت کر دیا کہ وہ دنیا کی نمبرون فوج ہے۔ ڈاکٹر محمد علی

لاہور (اُردو پوائنٹ اخبارتازہ ترین - اے پی پی۔ 08 مئی2025ء) وائس چانسلرپنجاب یونیورسٹی پروفیسر ڈاکٹر محمد علی نے کہا ہے کہ بھارتی جارحیت کا منہ توڑ جواب دینے پر پاک فوج کو خراج تحسین پیش کرتے ہیں اور پاک فوج نے ایک بار پھر ثابت کر دیا ہے کہ وہ دنیا کی نمبر 1فوج ہے۔ وہ پنجاب یونیورسٹی اکیڈمک سٹاف ایسو سی ایشن کے زیر اہتمام پاک فوج سے اظہار یکجہتی کیلئے منعقدہ عظیم الشان ریلی سے خطاب کررہے تھے۔

اس موقع پرصدر اکیڈیمک سٹاف ایسویسی ایشن ڈاکٹر امجد عباس مگسی، سیکرٹری ڈاکٹر محمد اسلام، صدرآفیسرز ویلفیئر ایسوسی ایشن ڈاکٹر توقیر،صدرپنجاب یونیورسٹی ایڈمنسٹریٹیو اینڈ ٹیکنیکل سٹاف ایسو سی ایشن چوہدری بشارت محمود،اساتذہ، ملازمین اور طلباطالبات سمیت سکول کے بچوں نے بڑی تعداد میں شرکت کی۔

(جاری ہے)

ریلی کے شرکا نے بھارتی جارحیت کے خلاف اور پاک فوج کے حق میں نعرے بازی کی۔

اپنے خطاب میں وائس چانسلر نے کہا کہ پاکستانی قوم متحد ہے، ہم کل بھی زندہ تھے ہم آج بھی زندہ ہیں۔ ہم وہ لوگ ہیں جو مرنے سے نہیں ڈرتے۔ انہوں نے کہا کہ ہم بھارت کی تعداد سے بھی نہیں ڈرتے۔پاکستان کی 25کروڑ عوام فوج ہے۔ انہوں نے کہا کہ ہم امن چاہتے ہیں مگر مودی نے جنگ شروع کی ہے لیک اسے ہم ختم کریں گے۔انہوں نے کہا کہ ہم اپنے تمام مجاہدوں کویہ پیغام دینا چاہتے ہیں کہ ہم آپ کے ساتھ ہیں۔

انہوں نے کہا کہ فوج جب بھی پکارے گی ہم سرحد پر آ کر لڑیں گے اوربھارت کو ایسا سبق سکھائیں گے کہ اس کی نسلیں یاد رکھیں گی۔ انہوں نے کہا کہ ہندوستان کو ہم توڑ کر دکھائیں گے اورخون کے آخری قطرے تک ملک کی حفاظت کریں گے۔ انہوں نے کہا کہ پنجاب یونیورسٹی کے تمام اساتذہ، ملازمین اور طلباطالبات پاک فوج کے شانہ بشانہ کھڑے ہیں۔ڈاکٹر امجد عباس مگسی نے کہا کہ بھارت ہمیشہ رات کی تاریکی میں ایسے اوچھے ہتھکنڈے استعمال کرتا ہے۔

انہوں نے کہا کہ ہم پاک فوج کی قربانیوں کو خراج تحسین پیش کرتے ہیں۔ انہوں نے کہا کہ بھارتی جارحیت کا ہر پلیٹ فارم پر مقابلہ کرنے کے لئے تیار ہیں۔انہو ں نے کہا کہ پاکستان کی سا لمیت پر کوئی سمجھوتہ نہیں ہو گا۔ انہوں نے کہا کہ پاکستان کی حفاظت کے لئے کسی قسم کی قربانی سے دریغ نہیں کریں گے۔