ؑلاہور داتا دربار خود کش حملے میں جانوں کا نذرانہ پیش کرنے والے پولیس شہدا کی 6 ویں برسی

ؔفیصل آباد کے تھانہ باہلک کے انویسٹی گیشن انچارج سب انسپکٹر احمد رضا دوران ریڈ ملزمان کی فائرنگ سے شہید

جمعرات 8 مئی 2025 22:25

Mلاہور (اُردو پوائنٹ اخبارتازہ ترین - آن لائن۔ 08 مئی2025ء) انسپکٹر جنرل پولیس پنجاب ڈاکٹر عثمان انور نے لاہور داتا دربار خود کش حملے میں جانوں کا نذرانہ پیش کرنے والے پولیس شہدا کی 6 ویں برسی کے موقع پر خراج عقیدت پیش کیا۔ آئی جی پنجاب نے کہا کہ فرض کی راہ میں جانیں قربان کرنے والے عظیم سپوتوں اور ان کی فیملیز کو سلام پیش کرتے ہیں۔ ترجمان پنجاب پولیس نے تفصیلات بتاتے ہوئے کہا کہ 2019ء میں آج ہی کے دن پنجاب پولیس کے 5 اہلکاروں نے لاہور داتا دربار پر دوران ڈیوٹی خود کش حملے میں جام شہادت نوش کیا۔

شہید ہونے والوں میں 03 ہیڈ کانسٹیبلز اور 02 کانسٹیبلز شامل ہیں۔ ہیڈ کانسٹیبلز گلزار علی، شاہد نذیر، محمد سہیل، کانسٹیبلز محمد سلیم اور صدام حسین نے دوران ڈیوٹی جام شہادت نوش کیا۔

(جاری ہے)

آئی جی پنجاب ڈاکٹر عثمان انور نے پنجاب پولیس فیصل آباد کے شہید سب انسپکٹر احمد رضا کی عظیم قربانی کوبھی خراج عقیدت پیش کیا۔ترجمان پنجاب پولیس نے تفصیلات سے آگاہ کرتے ہوئے بتایا کہ فیصل آباد کے تھانہ باہلک کے انچارج انویسٹی گیشن سب انسپکٹر احمد رضا دوران ریڈ ملزمان کی فائرنگ سے شہید ہو گئے۔

شہید سب انسپکٹر نے ٹیم کے ہمراہ دو اشتہاریوں اظہر اور رؤف کی گرفتاری کیلئے ریڈ کیا تو ملزمان نے پولیس پارٹی کو دیکھتے ہی فائرنگ شروع کر دی۔ سی پی او فیصل آباد، صاحبزادہ بلا عمر نے کہا کہ ملزمان کی گرفتاری کیلئے ٹیمیں تشکیل دے دی گئی ہیں اور جلد گرفتار کر لیا جائے گا۔ آئی جی پنجاب ڈاکٹر عثمان انور نے شہید سب انسپکٹر احمد رضا کی عظیم قربانی کو خراج عقیدت پیش کرتے ہوئے کہا کہ دکھ کی اس گھڑی میں شہید کے اہل خانہ کے ساتھ کھڑے ہیں۔ شہید کے اہلخانہ کو تنہا نہیں چھوڑیں گے اور فلاح و بہبود کا بھرپور خیال رکھا جائیگا۔