Live Updates

وزیراعلی پنجاب مریم نواز سے فن لینڈ کے سفیر کی ملاقات، باہمی تعلقات سمیت مختلف امور پر تبادلہ خیال

جمعہ 9 مئی 2025 20:48

لاہور (اُردو پوائنٹ اخبارتازہ ترین - اے پی پی۔ 09 مئی2025ء) وزیراعلی پنجاب مریم نواز سے فن لینڈ کے سفیر ہانو ریپاتی (Hannu Ripatti)نے ملاقات کی اور باہمی تعلقات، تعلیمی اشتراک کار و تجارت سمیت مختلف امور پر گفتگو ہوئی۔ملاقات میں تعلیم اور ٹیکنالوجی کے شعبے میں فن لینڈکی ترقی کو سراہا گیااور اشتراک کاربڑھانے کی ضرورت پر زور دیاگیا،ملاقات میں پاکستان اور فن لینڈ کے درمیان سفارتی تعلقات کے مزید فروغ کے لئے اعلی سطحی روابط بڑھانے پر اتفاق کیا گیا۔

(جاری ہے)

مریم نواز نے فن لینڈ کے سفارتخانے کی اسلام آباد میں بحالی کو خوش آئند قرار دیااورکہاکہ پاکستان اور فن لینڈ کے تعلقات جمہوریت اورپائیدار ترقی پر مبنی ہیں، تعلیم، ٹیکنالوجی اور ماحولیاتی تحفظ پر فن لینڈ کی مہارت قابل تقلید ہے،وزیراعلی نے کہاکہ فن لینڈ میں مقیم پاکستانی کمیونٹی فن لینڈ اور پاکستان کی ترقی میں مثبت کردار ادا کر رہے ہیں، پاکستان،فن لینڈ انٹرنیشنل کے مابین ووکیشنل ٹریننگ پر اشتراک ایک اہم سنگِ میل ہے،پرامن بقائے باہمی اور باہمی احترام ہمارے مشترکہ اقدار کا حصہ ہیں،وزیراعلی مریم نواز نے کہاکہ فن لینڈ کے لئے پنجاب میں قابل تجدید توانائی،زرعی ٹیکنالوجی، ڈیجیٹل خدمات اور تعلیم جیسے شعبوں میں بے شمار مواقع دستیاب ہیں۔