Live Updates

بھارت کی جانب سے کرتار پور راہداری نہ کھل سکی

سکھوں کی میزبانی کیلئے تیار، دربار انتظامیہ، بھارت راہداری فوری کھولے، رمیش سنگھ

منگل 13 مئی 2025 14:48

نارووال(اُردو پوائنٹ اخبارتازہ ترین - این این آئی۔ 13 مئی2025ء)پاک بھارت سیز فائر کے بعد بھی بھارت کی جانب سے کرتار پور راہداری نہ کھل سکی، بھارت کی جانب سے راہداری 6 اور 7 مئی کے بھارتی حملے کے بعد سے بند ہے، پاکستان کی جانب سے کرتارپور ہداری معمول کے مطابق کھلی ہے‘دربار انتظامیہ کا کہنا ہے ہم اپنے سکھ بھائیوں کی میزبانی کے لیے ہمہ وقت تیار ہیں۔

(جاری ہے)

دوسری طرف پاکستان سکھ گردوارہ پربندھک کمیٹی کے سربراہ اور وزیر برائے اقلیتی امور وانسانی حقوق پنجاب سردار رمیش سنگھ اروڑہ نے بھارت سے کرتار پور راہداری فوری کھولنے کا مطالبہ کیا ہے صوبائی وزیر نے بھارت سمیت دنیا بھر کے سکھوں کو دعوت دیتے ہوئے کہا کہ جون میں سکھوں کے پانچویں گرو ارجن دیو جی کے شہیدی دن اور مہاراجہ رنجیت سنگھ کی برسی منانے کیلئے وہ جب چاہیں پاکستان آسکتے ہیں، ہمارے دروازے ان کیلئے ہروقت کھلے ہیں, پاکستان اور سکھوں کا رشتہ مضبوط ہے جس کی بنیاد سکھ، مسلم دوستی پر قائم ہے۔

سردار رمیش سنگھ نے کہا کہ حالیہ پاک بھارت کشیدگی کے دوران بھارت سمیت دنیا بھر کی سکھ برادری نے پاکستان کے موقف کا بھرپور ساتھ دیا جس پر پاکستان کی ریاست، عوام اور حکومت سکھوں کی وفاداری کو قدر کی نگاہ سے دیکھتی ہے۔