ہم چاہتے ہیں اپنے والد عمران خان کی رہائی سے متعلق پاکستان پر بین الاقوامی دباو ہو، ٹرمپ سے مدد کی درخواست کریں گے، قاسم اور سلمان

لندن (اردوپوائنٹ اخبار تازہ ترین۔14 مئی 2025)بانی پی ٹی آئی عمران خان کے بیٹوں قاسم اور سلمان کا کہنا ہے کہ ہم چاہتے ہیںاپنے والد عمران خان کی رہائی سے متعلق پاکستان پر بین الاقوامی دباو ہو، امریکی صدر ٹرمپ سے مدد کی درخواست کریں گے، ہمارے پاس زیادہ آپشنز نہیں بچے، میڈیا رپورٹس کے مطابق اپنے ایک بیان میں بانی پی ٹی آئی کے بیٹوں نے کہا ہے کہ ہم نے فیصلہ کیا ہے کہ عوامی سطح پر آکر بات کرنا ہی واحد راستہ ہے۔

پاکستان پر بین الاقوامی دباﺅکے معاملے پر توجہ دینے کیلئے امریکی صدر ٹرمپ سے بہتر اور کون ہوگا ہم امریکی صدر سے بات کرنا چاہیں گے جس سے کوئی مدد مل سکے۔مجھے نہیں لگتا کہ میرے والد جیل سے رہائی کیلئے کوئی ڈیل کریں گے۔ ہم اپنے والد کی رہائی کیلئے تمام قانونی راستے اپنا چکے۔

(جاری ہے)

ہم نے ہر وہ راستہ اپنایا جو بانی پی ٹی آئی عمران خان کی رہائی میں مددگار ہوسکتا تھا۔

ہم اپنے والد کو آزاد کرانے اور پاکستان میں جمہوریت لانے کی جدوجہد کررہے ہیں۔ہمارے پاس زیادہ آپشنز نہیں بچے۔اس لئے ہم نے فیصلہ کیا ہے عوامی سطح پر آکر بات کرنا ہی واحد راستہ ہے۔ہمارے وہم وگمان میں بھی نہیں تھا کہ ہمارے والد عمران خان کو اتنا عرصہ جیل میں رکھا جائے گا۔ حالات دن بدن بد سے بدتر ہوتے جارہے ہیں۔ ہمیں اندازہ نہیں تھا کہ بانی پی ٹی آئی کو اتنا عرصہ جیل میں رکھا جائے گا۔

انہوں نے کہا کہ ہمارے والد غیرانسانی حالات میں زندگی گزار رہے ہیں انہیں بنیادی انسانی حقوق سے محروم رکھا گیا ہے۔ ان پر ایسے بھی مقدمات بنائے گئے ہیں جن میں انہیںسزائے موت ہوسکتی ہے۔خیال رہے کہ گزشتہ روز بھی بانی پی ٹی آئی عمران خان کے صاحبزادے سلیمان خان نے انکشاف کیا تھا کہ ہمارے والد کو سزائے موت دینے کی دھمکیاں دی جارہی تھیں۔

حالات بہت سنگین ہوگئے تھے۔ ہم پریشان تھے کیونکہ میرے والد پر ایسے مقدمات کرنے کی دھمکیاں دی گئی تھیں جن میں انہیں سزائے موت ہو سکتی تھی۔بانی پی ٹی آئی کے صاحبزادے قاسم خان کا کہنا تھا کہ عمران خان کا اللہ پر غیر متزلزل ایمان تھا۔ اسی طاقت کی بنا پر ان کے ارادے پختہ تھے۔انہیں توڑنے کی کوشش کرنے والے، آزما لیں! وہ نہیں ٹوٹیں گے۔سوشل میڈیا پلیٹ فارم ایکس پر ماریو ناوفل کے شو میں انٹرویو دیتے ہوئے انہوں نے کہا تھاکہ ہمارے والد عمران خان کو دو سال سے قید تنہائی میں رکھا ہوا تھا۔

کاش ہم اپنے والد سے فون پر گفتگو کر پاتے۔ ہماری اپنے والد سے فون پر گفتگو نہیں کرائی جاتی تھی۔ عدالت نے ہر ہفتے بات کروانے کا حکم دیا تھا لیکن دو دو مہینوں تک ہمارے بات نہیں کروائی جاتی تھی۔ ہماری جب والد سے بات کرائی بھی جاتی تھی تو لائن 20 منٹ پر کٹ جاتی تھی۔ آدھا وقت وہ ہمیں نصیحتیں کرتے۔ باقی ہماری زندگیوں کے بارے میں پوچھتے تھے۔قاسم خان کا کہنا تھاکہ ہم نے اپنے والد عمران خان کو آخری بار دیکھا جب انہیں 3 گولیاں لگی ہوئی تھیں۔ وہ مضبوط تھے۔ استقامت سے کھڑے تھے اور مسکرا رہے تھے۔ وہ انہیں توڑنے کی کوشش کر رہے ہیں لیکن وہ ڈیل نہیں کریں گے۔میرے والد بہت اصول پسند تھے وہ کبھی بھی ڈیل نہیں کریں گے اور نہ دوسرے لوگوں کی طرح کوئی ڈیل قبول کریں گے۔