پنجاب میں 19مئی تک درجہ حرارت میں اضافے اور ہیٹ ویو کا خدشہ، پی ڈی ایم اے کا الرٹ جاری

بدھ 14 مئی 2025 16:54

لاہور (اُردو پوائنٹ اخبارتازہ ترین - اے پی پی۔ 14 مئی2025ء) پنجاب کے بیشتر علاقوں میں کل سے 19مئی تک درجہ حرارت میں اضافے اور ہیٹ ویو کا خدشہ ظاہر کیا گیا ہے، پی ڈی ایم اے نے وزیر اعلی پنجاب کی ہدایت کے مطابق ضلعی انتظامیہ کو الرٹ جاری کر دیا۔ڈائریکٹر جنرل پی ڈی ایم اے عرفان علی کاٹھیا نے صوبہ بھر کے کمشنرز و ڈپٹی کمشنرز کو ہدایات جاری کرتے ہوئے کہا ہے کہ ضلعی انتظامیہ سمیت تمام متعلقہ محکمے متوقع ہیٹ ویو اور موسمی صورتحال کے پیش نظر الرٹ رہیں۔

محکمہ سکول ایجوکیشن، ہیلتھ، ٹرانسپورٹ، لوکل گورنمنٹ، ریسکیو 1122 اور دیگر متعلقہ محکموں کو کہا گیا ہے کہ کل15 سے19 مئی تک پنجاب کے بڑے شہروں اور میدانی علاقوں میں درجہ حرارت بڑھنے اور ہیٹ ویو کے خدشات ہیں،جس سے آئندہ چند دنوں میں بیشتر علاقوں کے درجہ حرارت میں غیر معمولی اضافے کا بھی امکان ہے۔

(جاری ہے)

ڈی جی پی ڈی ایم اے نے کہا کہ20 مئی تک درجہ حرارت04 سے07 ڈگری سینٹی گریڈ معمول سے زیادہ رہنے کا خدشہ ہے تاہم مغربی ہواوں کا سلسلہ 19 مئی کی شام سے پنجاب میں داخل ہونے کے امکانات ہیں،جس سے19 سے20 مئی کے دوران پنجاب کے بیشتر اضلاع میں بارش کا بھی امکان ہے۔

ڈی جی پی ڈی ایم نے کہا کہ انتظامیہ عوامی مقامات پر صاف پانی کی فراہمی کو یقینی بنائے۔ہسپتالوں اور موبائل ہیلتھ یونٹس میں ہیٹ سٹروک سے متعلق ابتدائی طبی امداد کی فراہمی یقینی بنائی جائے،گرمی اور لو کی شدت میں اضافے سے عوام بھی محتاط رہیں ۔دوپہر کے وقت کام کرنے والے لو سے بچنے کا اہتمام کریں۔ہلکے رنگ کے کپڑے پہنیں،سر ڈھانپ کر رکھیں۔بچوں بزرگوں کا خاص خیال رکھیں،غیر ضروری سفر سے گریز کریں۔پرنٹ سوشل و الیکٹرانک میڈیا کے ذریعے شہریوں کو ہیٹ ویو بارے آگاہی دی جائے۔انہوں نے مزید کہا کہ عوام کسی بھی ایمرجنسی میں پی ڈی ایم اے ہیلپ لائن 1129 یا ریسکیو 1122سے رابطہ کریں۔