اسلامیہ یونیورسٹی بہاولپور کے 20 طلباؤطالبات کو چین پاکستان اقتصادی راہداری ( سی پیک ) کے تحت مکمل فنڈڈ سپلٹ ڈگری پروگرام کے لیے منتخب کر لیا گیا

جمعرات 15 مئی 2025 17:22

بھاولپور (اُردو پوائنٹ اخبارتازہ ترین - اے پی پی۔ 15 مئی2025ء) اسلامیہ یونیورسٹی بہاولپور کے بی ایس فاریسٹری پروگرام کے پہلے بیچ (2024-28) کے 20 طلباؤطالبات کو چین پاکستان اقتصادی راہداری (CPEC) کے تحت مکمل فنڈڈ سپلٹ ڈگری پروگرام کے لیے منتخب کر لیا گیا ہے۔پروفیسر ڈاکٹر محمد کامران وائس چانسلر اسلامیہ یونیورسٹی بہاولپور نے سکالرشپ کے لیے منتخب ہونے والے طلباؤطالبات کو مبارکباد دی ہے۔

پروفیسر ڈاکٹر محمد کامران نے کہا کہ یہ شراکت داری اسلامیہ یونیورسٹی بہاولپور میں اعلیٰ تعلیم کی بین الاقوامی سطح پر وسعت کی جانب ایک اہم پیش رفت ہے اور اس بات کی عکاسی کرتی ہے کہ یونیورسٹی اپنے طلباء کو عالمی معیار کی تعلیمی اور ثقافتی سہولیات فراہم کرنے کے لیے پُرعزم ہے۔

(جاری ہے)

وائس چانسلر نے اس اسکالرشپ کے حصول کے سلسلے میں پروفیسر ڈاکٹر تنویر حسین ترابی ڈائریکٹر انسٹیٹیوٹ آف فاریسٹ سائنسز اور ڈین فیکلٹی آف ایگریکلچر اینڈ انوائرمنٹ اور فیکلٹی ممبران کی کاوشوں کو سراہا جنہوں نے اس بین الاقوامی تعلیمی شراکت داری کے حصول میں کلیدی کردار ادا کیا۔

اس پروگرام کے تحت طلباء کو مکمل فنڈڈ اسکالرشپ دی جائے گی جس میں ٹیوشن فیس، رہائش، سفر اور روزمرہ اخراجات شامل ہیں۔ طلباء اپنے تعلیمی سفر کے دوران ایک سال دو سمسٹرز جیانگسو ووکیشنل کالج آف ایگریکلچر اینڈ فاریسٹری اور یونان یونیورسٹی چین میں گزاریں گے۔ یہ پروگرام ایک مفاہمتی یادداشت کے تحت شروع کیا گیا جو اسلامیہ یونیورسٹی بہاولپور کے انسٹیٹیوٹ آف فاریسٹ سائنسز اور چین کی شراکت دار جامعات کے درمیان طے پایا تھا۔

اس مفاہمتی یادداشت کے تحت خزاں 2024 سے شروع ہونے والے ہر نئے بیچ کے طلباؤطالبات اس سپلٹ ڈگری پروگرام کے لیے اہل ہوں گے۔طلباوطالبات تین سال اسلامیہ یونیورسٹی بہاولپور میں اور ایک سال چین میں تعلیم حاصل کریں گے۔ بعد ازاں اسلامیہ یونیورسٹی بہاولپور واپس آ کر اپنی ڈگری مکمل کریں گے۔ یہ پروگرام نہ صرف تعلیمی ترقی کا ذریعہ بنے گا بلکہ اعلیٰ تعلیم بین الاقوامی اسکالرشپس اور چین میں ملازمت کے مواقع کے دروازے بھی کھولے گا۔