ملک میں روزمرہ استعمال کی ضروری اشیاء کی قیمتوں میں ہفتہ وار بنیادوں پر 1.03 فیصد اضافہ ریکارڈ

جمعہ 16 مئی 2025 16:53

اسلام آباد (اُردو پوائنٹ اخبارتازہ ترین - اے پی پی۔ 16 مئی2025ء) ملک میں روزمرہ استعمال کی ضروری اشیاء کی قیمتوں میں ہفتہ وار بنیادوں پر 1.03 فیصد اور سالانہ بنیادوں پر 1.29 فیصد اضافہ ریکارڈ کیا گیا ہے۔ پاکستان بیورو برائے شماریات کی طرف سے قیمتوں کے حساس اشاریہ بارے ہفتہ وار رپورٹ کے مطابق 15 مئی کو ختم ہونے والے ہفتہ میں صارفین کیلئے قیمتوں کا حساس اشاریہ 313.24 پوائنٹس ریکارڈ کیا گیا جو پیوستہ ہفتہ کے مقابلہ میں 1.03 فیصد زیادہ ہے۔

پیوستہ ہفتہ میں صارفین کیلئے قیمتوں کا حساس اشاریہ 310.05 پوائنٹس ریکارڈ کیا گیا تھا۔ گذشتہ ہفتہ کے دوران روزمرہ استعمال کی 12 ضروری اشیاء کی قیمتوں میں کمی اور 21 کی قیمتوں میں استحکام رہا۔ اس کے برعکس 18 اشیاء کی قیمتوں میں اضافہ ہوا۔

(جاری ہے)

گذشتہ ہفتہ کے دوران ٹماٹر کی قیمت میں 5.20 فیصد، لہسن 3.45 فیصد، پیاز 2.57 فیصد، آلو 1.93 فیصد، لپٹن چائے 1.14 فیصد، ایل پی جی 0.90 فیصد، باسمتی چاول 0.54 فیصد، اڑھائی کلو گھی 0.38 فیصد اور ایک کلو گھی 0.23 فیصد کی کمی ہوئی۔

چکن کی قیمت میں 15.95 فیصد، انڈے 8.34 فیصد، چینی 1.97 فیصد، لانگ کلاتھ 1.74 فیصد، خشک دودھ 1.59 فیصد، گڑ 1.48 فیصد، دال چنا 0.94 فیصد، پرنٹڈ لان 0.77 فیصد، مٹن 0.62 فیصد، پکا ہوا گوشت 0.49 فیصد اور انرجی سیور کی قیمت میں 0.31 فیصد کا اضافہ ہوا۔ 17 ہزار 732 روپے ماہوار آمدنی والے گروپ کیلئے قیمتوں کے حساس اشاریہ میں 0.92 فیصد کا اضافہ ہوا۔ 17 ہزار 733 روپے سے لے کر 22 ہزار 888 روپے، 22 ہزار 889 روپے سے لے کر 29 ہزار 517 روپے، 29 ہزار 518 روپے سے لے کر 44 ہزار 175 روپے اور اس سے زیادہ ماہوار آمدنی رکھنے والے گروپوں کیلئے قیمتوں کے حساس اشاریہ میں بالترتیب 1.02 فیصد، 0.98 فیصد، 1.06 فیصد اور 1.03 فیصد کا اضافہ ہوا۔

صارفین کیلئے قیمتوں کے حساس اشاریہ کا تعین ملک کے 17 بڑے شہروں کی 50 مارکیٹوں میں 51 ضروری اشیاء کی قیمتوں میں کمی بیشی کی بنیاد پر کیا جاتا ہے۔