مشرقی یوکرین میں ڈرون حملے میں متعدد شہری ہلاک

یو این ہفتہ 17 مئی 2025 23:30

اسلام آباد (اُردو پوائنٹ ۔ UN اردو۔ 17 مئی 2025ء) یوکرین کے مشرقی علاقے میں ہونے والے ڈرون حملے میں متعدد شہریوں کے ہلاک ہونے کی اطلاع ہے جبکہ ملک میں اقوام متحدہ کے مشن نے کہا ہے کہ یہ حالیہ ہفتوں کا مہلک ترین حملہ ہو سکتا ہے۔

یہ واقعہ آج سومے کے علاقے بیلوپیلا میں پیش آیا جہاں ایک مسافر بس روس کے ڈرون کا نشانہ بنی۔ اس حملے میں کم از کم نو افراد ہلاک اور سات زخمی ہوئے ہیں۔

ملک میں انسانی حقوق کی نگرانی کرنے والے مشن (ایچ آر ایم ایم یو) کے مطابق، ابتدائی اطلاعات سے اندازہ ہوتا ہے کہ بس میں سوار شہری محاذ جنگ کے قریبی علاقے سے نقل مکانی کر کے آ رہے تھے جن میں خواتین کی اکثریت تھی۔

(جاری ہے)

مشن کے حکام اس حملے اور متاثرین کے بارے میں مزید معلومات جمع کر رہے ہیں۔

کڑی یاد دہانی

اقوام متحدہ کے مشن کی سربراہ ڈینیل بیل نے کہا ہے کہ یہ حملہ اس بات کی کڑی یاد دہانی ہے کہ یوکرین بھر میں عام شہری متواتر ہلاک و زخمی ہو رہے ہیں۔

اس سے قبل 24 اپریل کو ملکی دارالحکومت کیئو میں ہونے والے میزائل حملے میں کم از کم 11 شہری ہلاک اور 81 زخمی ہو گئے تھے۔

مشن کا کہنا ہے کہ اگرچہ رواں مہینے یوکرین میں ہلاک ہونے والے شہریوں کی تعداد اپریل کی نسبت کم ہے تاہم روزانہ کسی نہ کسی جگہ، بالخصوص محاذ جنگ کے قریبی علاقوں سے ہلاکتوں کی اطلاعات موصول ہو رہی ہیں۔

امن بات چیت کا خیرمقدم

اقوام متحدہ نے روس اور یوکرین کے مابین ترکیہ میں ہونے والی بات چیت کا خیرمقدم کرتے ہوئے امید ظاہر کی ہے کہ اس عمل کا نتیجہ مکمل، فوری اور غیرمشروط جنگ بندی کی صورت میں نکلے گا۔

گزشتہ تین سال میں یہ پہلا موقع ہے جب دونوں ممالک قیام امن کے لیے آپس میں براہ راست گفت و شنید کر رہے ہیں۔ ترکیہ کے شہر استنبول میں ہونے والے ان مذاکرات میں جنگ بندی کے علاوہ بڑے پیمانے پر قیدیوں کے تبادلے پر بھی بات ہو گی۔

جمعہ کو اقوام متحدہ کی ترجمان سٹیفنی ٹریمبلے نے کہا تھا کہ ادارہ اس بات چیت میں سہولت دینے کے لیے ترکیہ اور امریکہ کے کردار کا اعتراف کرتا ہے۔

انہوں نے اس امید کا اظہار کیا ہے کہ یہ بات چیت اقوام متحدہ کے چارٹر، بین الاقوامی قانون اور اقوام متحدہ کی متعلقہ قراردادوں کی مطابقت سے یوکرین میں منصفانہ جامع اور پائیدار امن کے لیے راہ ہموار کرے گی۔

روس نے فروری 2022 میں یوکرین کے خلاف بڑے پیمانے پر جنگ شروع کی تھی۔ جنگ کے ابتدائی مہینوں کے بعد فریقین میں بات چیت کا یہ پہلا موقع ہے۔