وفاق بجٹ سے پہلے ضم شدہ اضلاع کے فنڈز منتقل کرے، خیبرپختونخواہ حکومت کا مطالبہ

وفاقی حکومت نے ضم شدہ اضلاع کا مالی حصہ غیر قانونی طور پر اپنے پاس رکھا ہوا ہے؛ مشیراطلاعات بیرسٹر سیف

ساجد علی اتوار 18 مئی 2025 12:25

وفاق بجٹ سے پہلے ضم شدہ اضلاع کے فنڈز منتقل کرے، خیبرپختونخواہ حکومت ..

پشاور ( اُردو پوائنٹ اخبارتازہ ترین۔ 18 مئی2025ء) مشیر اطلاعات خیبر پختونخواہ بیرسٹر سیف نے مطالبہ کرتے ہوئے کہا ہے کہ وفاقی حکومت بجٹ سے قبل قومی مالیاتی کمیشن کا اجلاس بلا کر خیبر پختونخواہ کو ضم شدہ اضلاع کا حصہ فوری طور پر منتقل کرے۔ اس حوالے سے اپنے ایک بیان میں انہوں نے خیبر پختونخواہ حکومت آئندہ بجٹ میں ضم شدہ اضلاع کے لیے ریلیف پیکیج تیار کر رہی ہے لیکن وفاقی تاخیر اس میں رکاوٹ بن رہی ہے کیوں کہ وفاق نے ضم شدہ اضلاع کا مالی حصہ غیر قانونی طور پر اپنے پاس رکھا ہوا ہے، نیٹ ہائیڈل منافع کے بقایاجات بھی بجٹ سے پہلے ادا کیے جائیں تاکہ صوبہ ان فنڈز کو ضم شدہ اضلاع کی ترقی میں بروئے کار لا سکے،وزیراعلیٰ خیبر پختونخواہ نے ضم شدہ اضلاع کے مالیاتی مسائل اور نیٹ ہائیڈل منافع سے متعلق وزیراعظم کو دو الگ الگ خط بھیجے لیکن تاحال کوئی جواب نہیں ملا۔

(جاری ہے)

بیرسٹر سیف کا کہنا ہے کہ ضم شدہ اضلاع کی ترقی سے دہشت گردی میں واضح کمی لائی جا سکتی ہے، اگر وفاقی حکومت واقعی دہشت گردی کے خاتمے میں سنجیدہ ہے تو ان علاقوں کے فنڈز فوری طور پر خیبر پختونخواہ کو منتقل کیے جائیں، دہشت گردی صرف ایک صوبے نہیں بلکہ پورے ملک کا مسئلہ ہے لہٰذا وفاق صوبائی حکومت سے بھرپور تعاون کرے لیکن وفاق خیبر پختونخواہ کے ساتھ سوتیلی ماں جیسا سلوک کر رہا ہے، یہ سلوک بند کیا جانا چاہیئے تاکہ پورے ملک میں امن، ترقی اور خوشحالی کی راہ ہموار ہو سکے۔