Live Updates

جامع مسجد سرینگر میں ہفتہ شہادت کے تحت تلاوت قرآن مقابلہ

پیر 19 مئی 2025 12:32

سرینگر (اُردو پوائنٹ اخبارتازہ ترین - اے پی پی۔ 19 مئی2025ء) بھارت کےغیرقانونی طورپر زیر تسلط جموں وکشمیرمیں میرواعظ مولوی محمد فاروق کی 35ویں برسی کے سلسلے میں جاری ''ہفتہ شہادت '' کے تحت انجمن اوقاف جامع مسجد سرینگر نے ایک روزہ خصوصی پروگرام کا اہتمام کیا جس میں قرآن خوانی، تلاوت قرآن کا مقابلہ اوردعائیہ مجلس کا انعقاد کیا گیا۔کشمیر میڈیا سروس کے مطابق میر واعظ مولوی محمدفاروق کو نامعلوم حملہ آوروں نے21مئی 1990کونگین سرینگر میں ان کی رہائش گاہ پر شہیدکیا تھا۔

دور دراز کے علاقوں سمیت کشمیر بھر سے 30سے زائد سرکردہ مدارس نے تقریب میں حصہ لیاجس میں درجنوں نوجوان قرآنے علمائے کرام، ائمہ مساجد اور عوامی نمائندوں کے ایک بڑے مجمعے کے سامنے اپنی قرات کی مہارت کا مظاہرہ کیا۔

(جاری ہے)

پروگرام کی صدارت انجمن اوقاف کے چیئرمین میرواعظ عمر فاروق نے کی جنہوں نے اپنے خطاب میں اپنے شہید والد اور پیش رو کو خراج عقیدت پیش کیا۔

میرواعظ نے کہا کہ اس تقریب کا انعقاد نہ صرف شہید رہنما کو خراج عقیدت پیش کرنے کے لیے بلکہ نوجوان نسل میں قرآن اور اس کی تعلیمات سے گہرا لگا ئوپیدا کرنے کے لیے کیا گیا ہے۔میرواعظ نے شرکت کرنے والے اداروں اور علما ئے کرام کا شکریہ ادا کرتے ہوئے کہاکہ یہ اجتماع ہمارے نوجوانوں کو کلام اللہ سے جڑے رہنے اور اس کی رہنمائی کے مطابق زندگی گزارنے کی ترغیب دینے کی ایک عاجزانہ کوشش ہے۔