سی سی پی او بلال صدیق کمیانہ کی زیرِ نگرانی منشیات سے پاک لاہور کا مشن

پیر 19 مئی 2025 13:28

لاہور(اُردو پوائنٹ اخبارتازہ ترین - این این آئی۔ 19 مئی2025ء)سی سی پی او بلال صدیق کمیانہ کی زیر ِ نگرانی منشیات سے پاک لاہور کا مشن جاری ہے۔ رواں سال منشیات فروشوں کے خلاف کارروائیوں میں 4704ملزمان کو گرفتارکر کی4607مقدمات کا اندرج کیا گیا ہے۔یہ بات ترجمان لاہور پولیس نے بتایا کہ گرفتار ملزمان کے قبضہ سے 2660کلو چرس ،338کلو آئس ،215کلو افیون،207کلو ہیروئین اور26ہزارسے زائد لیٹرشراب برآمد کی گئی ہے۔

سی سی پی او لاہورنے منشیات کے خاتمے کیلئے منظم کریک ڈاؤن جاری رکھنے کے احکامات جاری کرتے ہوئے کہا کہ نوجوان نسل کو منشیات خصوصاًً آئس کے نشے سے بچانا ہماری اہم ذمہ داری ہے۔بلال صدیق کمیانہ نے کہا کہ تعلیمی اداروں کے اطراف منشیات فروشوں کے خلاف باقاعدگی سے سرچ اور کومبنگ آپریشنزکئے جائیں۔

(جاری ہے)

سی سی پی او لاہور نے کہا کہ انسدادِ منشیات کیلئے متعلقہ اداروں کے ساتھ انفارمیشن شیئرنگ اور باہمی تعاون کویقینی بنایا جائے۔

انہوں نے کہا کہ ماڈرن ڈرگزکی خرید و فروخت اورآن لائن سپلائی کے خلاف ٹارگٹڈ آپریشنز میں تیزی لائی جائے۔بلال صدیق کمیانہ نے کہا کہ متعلقہ افسران پراسیکیوشن ڈیپارٹمنٹ کے اشتراک سے منشیات کے کیسوں کو جلد منطقی انجام تک پہنچائیں۔ انہوں نے مزید کہا کہ منشیات کے خلاف آگاہی مہم میں والدین، اساتذہ، سول سوسائٹی اور ذرائع ابلاغ کے نمائندوں کا کردار انتہائی اہم ہے۔