Live Updates

قومی خزانے کو 8 کروڑ 14 لاکھ روپے سے زائد کا نقصان پہنچانے کا الزام

پیر 19 مئی 2025 21:52

اسلام آباد(اُردو پوائنٹ اخبارتازہ ترین - آن لائن۔ 19 مئی2025ء)بدعنوانی اور خورد بردکیس میں کسٹم اہلکار سمیت 2 ملزمان گرفتارکرلئے گئے ہیں۔ ترجمان ایف آئی اے کے مطابق ایف آئی اے اینٹی کرپشن سرکل اسلام نے بڑی کارروائی کے دوران کروڑوں روپے کی بدعنوانی اور خورد برد میں ملوث کسٹم آفیسر سمیت 2 ملزمان گرفتار کرلئے۔گرفتار ملزمان کی شناخت امداد علی اور صابر علی کے نام سے ہوئی۔

امداد علی پاکستان کسٹم سروسز میں بطور پرنسپل اپریزر تعینات تھا۔ ملزم نے صابر علی کے ساتھ مل کر قومی خزانے کو 8 کروڑ 14 لاکھ روپے سے زائد کا نقصان پہنچایا۔ ملزمان کو سپیشل عدالت سنٹرل سے ضمانت قبل از گرفتاری منسوخ ہونے پر گرفتار کیا گیا۔ ابتدائی تفتیش کے مطابق ملزم صابر علی نے اپنی کمپنی کے ذریعے 2019 سے 2021 کے درمیان امریکی برانڈ آئس کریم کی 29 شپمنٹس درآمد کیں۔

(جاری ہے)

ملزم نے مذکورہ شپمنٹس کی کلئیرنس کے لیے پاکستان کسٹمز کو انڈرانوئسنگ دستاویزات پیش کی۔ملزمان نے انڈر انوائسنگ کے ذریعے درآمدی اشیا کی کم قیمت ظاہر کی تاکہ کسٹمز ڈیوٹی اور ٹیکسز سے بچا جا سکے۔ملزم امداد علی نے شپمنٹس کی انڈر انوائسنگ کی، جس کے باعث قومی خزانے کو مجموعی طور پر 8 کروڑ 14 لاکھ روپے سے زائد کا نقصان پہنچا۔ملزمان کو گرفتار کر کے تفتیش کا آغاز کر دیا گیا ہے۔