Live Updates

مختلف ممالک سے چھ لاکھ 70 ہزار عازمین حج سعودی عرب پہنچ گئے،سعودی وزارت حج عمرہ

منگل 20 مئی 2025 11:00

ریاض (اُردو پوائنٹ اخبارتازہ ترین - اے پی پی۔ 20 مئی2025ء) سعودی وزارت حج عمرہ نے کہا ہے کہ اب تک مختلف ممالک سے 42 فیصد عازمین حج مملکت پہنچ چکے ہیں جن کی تعداد 6 لاکھ 70 ہزار سے زیادہ ہے۔اردو نیوز کےمطابق حج 2025 کی ادائیگی کے لئے دنیا بھر سے فضائی، بری اور بحری ذرائع سے عازمین کے قافلوں کی یومیہ بنیاد پر آمد کا سلسلہ جاری ہے۔فضائی راستوں سے 5 لاکھ 89 ہزار 200 جبکہ زمینی راستے سے 17 ہزار اور بحری ذریعے سے ایک لاکھ 4 ہزارعازمین مملکت پہنچ چکے ہیں۔

عازمین کے لئے امیگریشن سروسز فراہم کرنے والے ادارے جوازات نے کہا کہ عازمین کے استقبال اور انہیں بہترین سہولیات فراہم کرنے کے لئے اہلکاروں کو مختلف زبانیں سیکھائی گئی ہیں تاکہ عازمین کو بہتر انداز میں رہنمائی کی جاسکے۔

(جاری ہے)

اس سے قبل سعودی وزارت داخلہ نے بتایا کہ روٹ ٹو مکہ پروگرام کے آغاز سے رواں سال 18 مئی تک 10 لاکھ عازمین حج اس سے مستفید ہوئے ہیں۔

سعودی وژن 2030 کے تحت یہ پروگرام 7 ممالک کے 11 ایئرپورٹس پر عازمین کے سفرکے طریقہ کار کو آسان بناتا ہے۔ پاکستان، ملائیشیا، انڈونیشیا، بنگلہ دیش، ترکیہ ، مراکش اور آئیوری کوسٹ میں شامل ہیں۔سعودی ریلوے سار نے گزشتہ سال کے مقابلے میں حج 2025 کے لئے نشستوں میں 25 فیصد اضافہ کیا ہے۔رواں سال حرمین ریلوے کے ذریعے 20 لاکھ عازمین کو سروس فراہم کی جائے گی جس کے لئے رواں سال 4 لاکھ نشستوں کا اضافہ ہو سکے گا۔