Live Updates

بھارت کی چمچہ گیری بھی دنیش کنیریا کے کام نہ آئی، سٹیڈیم گیلری سے تصویر ہٹادی گئی

جے پور کے سوائی مان سنگھ سٹیڈیم سے 44 سالہ لیگ سپنر کی فوٹو ہٹائی گئی ہے

ذیشان مہتاب منگل 20 مئی 2025 12:10

بھارت کی چمچہ گیری بھی دنیش کنیریا کے کام نہ آئی، سٹیڈیم گیلری سے تصویر ..

لاہور (اردو پوائنٹ تازہ ترین اخبار ۔ 20 مئی 2025ء ) پاکستان مخالف بیانات اور مذہب تبدیلی کے حوالے سے شاہد آفریدی پر الزامات کیلئے مشہور سابق لیگ سپنر دنیش کنیریا کی بھارت نوازی بھی کام نہ آئی۔

میڈیا رپورٹس کے مطابق بھارتی جارحیت کے بعد پاکستانی جواب نے انتہاپسند نریندر مودی کی حکومت کو دنیا بھر میں رسوا کردیا ہے جبکہ دونوں ممالک کے درمیان سفارتی تعلقات کے سبب جے پور کے سوائی مان سنگھ سٹیڈیم نے لیگ سپنر دنیش کنیریا کی گیلری سے تصویر بھی ہٹادی ہے۔

سوائی مان سنگھ اسٹیڈیم میں 44 سالہ دنیش کنیریا کی تصویر کی موجودگی پر ہندو انتہاپسندوں نے شدید احتجاج کیا تھا تاہم سٹیڈیم حکام کا موقف تھا کہ قابل ذکر کرکٹرز کے اعزاز تصویر گیلری کا حصہ تھی۔

(جاری ہے)

انیل دلپت کے بعد پاکستان کے دوسرے ہندو کرکٹر دنیش کنیریا نے 2000ء سے 2012ء کے درمیان 61 ٹیسٹ اور 18 ون ڈے میچوں میں قومی ٹیم کی نمائندگی کی تھی جس میں انہوں نے 261 ٹیسٹ وکٹیں حاصل کیں۔

بھارت کیخلاف دنیش کنیریا کا ریکارڈ خاص طور پر قابل ذکر تھا، جس میں 11 ٹیسٹ اور 2 ون ڈے میچوں میں 44 وکٹیں شامل ہیں۔

خیال رہے کہ 2012ء میں انگلینڈ اینڈ ویلز کرکٹ بورڈ کی جانب سے ایسیکس کے ساتھ کاؤنٹی کرکٹ کھیلنے کے دوران سپاٹ فکسنگ سکینڈل میں ملوث ہونے پر انہیں تاحیات پابندی کا سامنا کرنا پڑا تھا۔