ڈی جی پی ڈی ایم اے نےمویشی منڈیوں میں ہیٹ ویو سے بچائو کیلئے جانوروں کو پانی کی فراہمی، شیڈز اور ویٹرنری ہیلتھ سنٹرز کے قیام کو یقینی بنانے کی ہدایات جاری کردی

منگل 20 مئی 2025 18:27

لاہور (اُردو پوائنٹ اخبارتازہ ترین - اے پی پی۔ 20 مئی2025ء) ڈی جی پی ڈی ایم اے عرفان علی کاٹھیا نے پنجاب میں عیدالاضحیٰ کی مناسبت سے مویشی منڈیوں میں ہیٹ ویو سے بچا ئوکیلئے ہدایات جاری کر تے ہو ئے کہا ہے کہ صو بہ کی مویشی منڈیوں میں جانوروں کو پانی کی فراہمی ، عارضی شیڈز اور ویٹرنری ہیلتھ سنٹرز کے قیا م کو یقینی بنا یا جا ئے ۔ انہوں نے کہا کہ جون کے مہینے میں بھی ہیٹ ویو اور گرمی کی لہر برقرار رہنے کے امکانات ہیں،احتیاطی تدابیر اختیار کر کے گرمی اور ہیٹ ویو سے بچا جا سکتا ہے ۔

انہوں نے کہا کہ منڈیوں میں مویشی بیچنے اور خریدنے والے احتیاطی تدابیر اختیار کریں ۔ پی ڈی ایم اے بیوپاریوں اور عملے کی فوری طبی امداد کے لیے منڈی کی جگہوں پر طبی امدادی مراکز قائم کر ے اورایمرجنسی صورتحال پر ردعمل کے لیے ریسکیو 1122 کے ساتھ مل کر موبائل میڈیکل ٹیموں کی تعیناتی عمل میں لائی جائے۔

(جاری ہے)

انہوں نے کہا کہ پی ڈی ایم اے منڈیوں میں دھول کو دبانے کے لیے تمام مقامات پر واٹر اسپرنکلرز یا مسٹنگ فینز کی باقاعدگی سے تنصیب کر ے جبکہ منڈیوں کے داخلی و خارجی راستوں پر ہیٹ ویو سے بچا ئو اور حفاظتی تجاویز بارے آگاہی بینرز آویزاں کیے جا ئیں۔

عرفان علی کاٹھیا نے کہا کہ خریداروں اور بیوپاریوں کو ہائیڈریٹ رہنے، سایہ دار علاقوں کا استعمال کرنے اور کسی بھی ایمرجنسی کی فوری اطلاع دینے کے لیے لائوڈ سپیکرز کا استعمال کیا جائے اورتمام اضلاع میں ہیٹ ویو ایس او پیز پر عملدرآمد کے بارے میں روزانہ دو بار بریفنگ لازمی فراہم کی جائے۔