Live Updates

96فیصد پاکستانی بھارتی جارحیت کا بھرپور جواب دینے پر خوش دکھائی دئیے، سروے جاری

پاک بھارت سیز فائر معاہدے کو پاکستانی عوام کی اکثریت کی حمایت حاصل ہے،گیلپ پاکستان

منگل 20 مئی 2025 22:35

اسلام آباد(اُردو پوائنٹ اخبارتازہ ترین - این این آئی۔ 20 مئی2025ء)عوامی آرا جاننے والے ادارے گیلپ پاکستان نے پاکستان اور بھارت کی حالیہ کشیدگی کے حوالے سے نیا سروے جاری کردیا۔گیلپ پاکستان کے نئے سروے میں انکشاف کیا گیاکہ پاک بھارت سیز فائر معاہدے کو پاکستانی عوام کی اکثریت کی حمایت حاصل ہے اور 91فیصد پاکستانیوں نے سیز فائر معاہدے کو درست فیصلہ قرار دیا۔

(جاری ہے)

سروے میں کہا گیا ہے کہ 96فیصد پاکستانی بھارتی جارحیت کا بھرپور جواب دینے پر بھی خوش دکھائی دیے اور حالیہ تنازع میں پاکستان کو فاتح قرار دیا۔سروے میں اس سوال پر کہ کیا بھارت سیزفائر معاہدے کی مکمل پابندی کرے گا52فیصد پاکستانی پراعتماد نظر آئے اور کہا کہ بھارت کو جنگ بندی جاری رکھنی پڑے گی۔ البتہ 34 فیصد نے شک کا اظہار کیا اور کہا کہ بھارت سیز فائر معاہدہ توڑ دے گا۔جنگ کس کی جانب سے شروع کی گئی اس پر 87فیصد نے بھارت کی جانب سے پاکستان پر جنگ مسلط کرنے کا کہا جبکہ 4 فیصد نے دونوں کو قصور وار ٹھہرایا۔