Live Updates

حکومت برآمدات پر مبنی نمو کے حصول میں پرعزم ہے، پاکستان میں ڈچ کی کمپنیوں کی سرمایہ کاری کا خیرمقدم کریں گے،وفاقی وزیر خزانہ کی نیدرلینڈز کی سفیرسے ملاقات میں گفتگو

بدھ 21 مئی 2025 16:53

اسلام آباد (اُردو پوائنٹ اخبارتازہ ترین - اے پی پی۔ 21 مئی2025ء) وفاقی وزیر برائے خزانہ و محصولات سینیٹر محمد اورنگزیب نے برآمدات پر مبنی نمو کے حوالہ سے حکومت کے عزم کا اعادہ کرتے ہوئے کہاہے کہ نجی شعبہ معیشت کی ترقی کا اصل محرک ہے، کلیدی معاشی اشاریوں کی معیشت کی درست سمت کی عکاسی ہورہی ہے۔انہوں نے یہ بات بدھ کویہاں نیدرلینڈز کی سفیر ہینی ڈی فریس سے وزارت خزانہ میں ملاقات میں کہی۔

ملاقات کے دوران دونوں فریقین نے باہمی دلچسپی کے امور اور دوطرفہ معاشی تعاون کو مزید مضبوط بنانے کے امکانات پر بات چیت کی۔ وزیر خزانہ نے پاکستان کی موجودہ معاشی صورتحال اور حکومتی اصلاحات کے ایجنڈے سے سفیر کو آگاہ کیا اورخاص طور پر معیشت کے اہم شعبوں پر روشنی ڈالی۔

(جاری ہے)

انہوں نے پائیدار، پیداواری اور برآمدات پر مبنی ترقی کے لئے حکومت کے عزم کا اظہار کیا اور اس بات پر زور دیا کہ نجی شعبہ معیشت کی ترقی کا اصل محرک ہے۔

انہوں نے پاکستان میں ترقی اور صلاحیت بڑھانے کے مختلف منصوبوں میں نیدرلینڈز کی تکنیکی اور مالی مدد کو سراہا۔سینیٹر اورنگزیب نے پاکستان میں نیدر لینڈز کی کمپنیوں کی دلچسپی اور سرمایہ کاری کا خیرمقدم کیا اور غیر ملکی سرمایہ کاری کے لئے آسانیاں پیدا کرنے اور بہتر کاروباری ماحول فراہم کرنے کے حکومتی عزم کا اعادہ کیا۔سفیر ہینی ڈی فریس نے حکومت کی معاشی اصلاحات اور برآمدات پر مبنی پالیسیوں کو سراہا اور پاکستان کی معاشی ترقی کے لئے نیدرلینڈز کی حمایت کا اعادہ کیا۔

انہوں نے مختلف شعبوں میں تعاون بڑھانے کی خواہش کا اظہار کیا۔فریقین نے پاکستان اور نیدرلینڈز کے درمیان تعلقات کو مزید مضبوط بنانے اور باہمی دلچسپی کے شعبوں میں تعاون جاری رکھنے کے عزم کا اظہار کیا۔