Live Updates

پی پی 52 ضمنی الیکشن؛ غیرحتمی نتائج میں ن لیگی امیدوار کو واضح برتری حاصل، وکٹری سپیچ بھی کردی

پنجاب اسمبلی کے اس حلقے کے 185 پولنگ اسٹیشنز میں سے 177 کے غیر حتمی اور غیر سرکاری نتائج سامنے آگئے

ساجد علی پیر 2 جون 2025 00:02

پی پی 52 ضمنی الیکشن؛ غیرحتمی نتائج میں ن لیگی امیدوار کو واضح برتری ..

سیالکوٹ ( اُردو پوائنٹ اخبارتازہ ترین۔ 01 جون 2025ء ) پنجاب اسمبلی کی نشست پی پی 52 سالکوٹ کے ضمنی الیکشن کے غیرحتمی غیرسرکاری نتائج میں ن لیگی امیدوار نے واضح برتری حاصل کرلی جس کے بعد انہوں نے وکٹری سپیچ بھی کردی۔ میڈیا رپورٹس کے مطابق پی پی 52 سیالکوٹ کے 185 پولنگ اسٹیشنز میں سے 177 کے غیر حتمی اور غیر سرکاری نتائج سامنے آگئے جن میں مسلم لیگ ن کو واضح برتری حاصل ہے، ان غیر حتمی اور غیر سرکاری نتائج میں مسلم لیگ ن کی امیدوار حنا ارشد 74 ہزار 691 ووٹ لے کر پہلے نمبر پر ہیں، پاکستان تحریک انصاف کے حمایت یافتہ آزاد امیدوار فاخر نشاط 38 ہزار 631 ووٹ لے کر دوسرے نمبر پر ہیں۔

بتایا گیا ہے کہ پی پی 52 کے ضمنی انتخاب کے دوران پاکستان تحریک انصاف کی جانب سے مبینہ دھاندلی کے خلاف شدید احتجاج کیا گیا، پی ٹی آئی کارکنوں نے آر او آفس کے باہر احتجاج کیا جہاں الیکشن عملے کی جانب سے فارم 45 میں مبینہ رد و بدل کے الزامات لگائے گئے اس دوران انتظامیہ نے آر او آفس کو کنٹینرز لگا کر سیل کردیا جس پر پی ٹی آئی کارکن مشتعل ہوگئے، پولیس نے مظاہرین کو پیچھے دھکیلنے کی کوشش کی جس پر کارکنوں نے مزاحمت کی، پولیس نے مظاہرہ منتشر کرنے کے لیے کارروائی کرتے ہوئے ایک کارکن کو حراست میں لے لیا لیکن علاقے میں کشیدگی برقرار رہی جس کی وجہ سے سکیورٹی مزید سخت کردی گئی۔

(جاری ہے)

معلوم ہوا ہے کہ پولنگ کے دوران پاکستان تحریک انصاف اور پیپلز پارٹی کی جانب سے مسلم لیگ ن پر الیکشن میں دھاندلی اور غنڈہ گردی کے الزامات عائد کیے گئے، پی پی رہنماء راجہ پرویز اشرف نے کہا کہ ایسی شکایات بھی آئیں کہ ووٹرز کے پہنچتے ہی متعلقہ افسر نے پولنگ بند کرکے کمرے سے پولنگ ایجنٹس اور ووٹر کو باہر نکال دیا۔ پاکستان تحریک انصاف کے ترجمان شیخ وقاص اکرم کا کہنا تھا کہ سیالکوٹ ضمنی انتخابات میں مینڈیٹ پر ڈاکہ مارا گیا تو عوام سڑکوں پرنکلیں گے، تحریک انصاف کے ورکروں اورکارکنوں پرتشدد کیا گیا، انہیں ڈرایا دھمکایا گیا اس کے باوجود لوگ ہمارے ساتھ ہیں، مدت مکمل ہونے کے باوجود براجماں چیف الیکشن کمشنر کیا کررہے ہیں؟۔