ایمل ولی چرس کا سگریٹ پی کر کمیٹی اجلاس میں آئے ہیں، چیئرمین پی ٹی اے کا الزام

آپ کو تکلیف کیا ہے؟ ایک سرکاری ملازم کا یہ انداز بالکل قابل قبول نہیں، آپ کو یہ جرات کس نے دی ہے کہ ایسے بات کریں؟ سربراہ عوامی نیشنل پارٹی کا میجر جنرل ریٹائرڈ حفیظ الرحمان پر اظہار برہمی

ساجد علی بدھ 21 مئی 2025 17:29

ایمل ولی چرس کا سگریٹ پی کر کمیٹی اجلاس میں آئے ہیں، چیئرمین پی ٹی اے ..

اسلام آباد ( اُردو پوائنٹ اخبارتازہ ترین۔ 21 مئی 2025ء ) چیئرمین پی ٹی اے میجر جنرل ریٹائرڈ حفیظ الرحمان نے عوامی نیشنل پارٹی کے سربراہ سینیٹر ایمل ولی خان پر چرس پینے کا الزام عائد کردیا۔ تفصیلات کے مطابق چیئرمین آغا شاہزیب درانی کی زیر صدارت سینیٹ کی قائمہ کمیٹی کا اجلاس ہوا جہاں چیئرمین پی ٹی اے نے الزام عائد کرتے ہوئے کہا کہ ’ایمل ولی چرس کا سگریٹ پی کر کمیٹی اجلاس میں آئے ہیں، مجھے بھی چرس کا سگریٹ دیں‘۔

میڈیا رپورٹس میں بتایا گیا ہے کہ چیئرمین پی ٹی اے کی جانب سے چرس پینے کا الزام عائد کیے جانے وار طنزیہ رویہ اختیار کرتے ہوئے چیئرمین قائمہ کمیٹی سے چرس کے سگریٹ کا تقاضا کرنے پر سینیٹر ایمل ولی خان چیئرمین پی ٹی اے پر بھڑک اٹھے اور انہیں مخاطب کرتے ہوئے کہا کہ ’آپ کو تکلیف کیا ہے؟ ایک سرکاری ملازم مجھے کیسے کہہ سکتا ہے کہ تم چرس پی کر آئے ہو؟‘۔

(جاری ہے)

عوامی نیشنل پارٹی کے سربراہ نے کہا کہ ’ایک سرکاری افسر کا یہ انداز بالکل قابل قبول نہیں، آپ کو یہ جرات کس نے دی ہے کہ ایسے بات کریں؟‘، اس پر چیئرمین پی ٹی اے سینیٹر ایمل ولی خان سے بار بار معافی مانگتے رہے اور کہا کہ ’مجھ سے غلطی ہوگئی ہے‘، تاہم سینیٹر ایمل ولی نے کہا کہ ’اگر آپ چرس اور شراب پیتے ہیں تو ایسی باتیں کیا کریں‘، اس کے ساتھ ہی انہوں نے قائمہ کمیٹی سے چیئرمین پی ٹی اے کے خلاف کارروائی کا مطالبہ کیا۔

سربراہ عوامی نیشنل پارٹی نے کہا کہ ’چیئرمین پی ٹی اے اجلاس میں رہے گا یا میں رہوں گا‘، اس پر چیئرمین پی ٹی اے میجر جنرل ریٹائرڈ حفیظ الرحمان کو قائمہ کمیٹی کا اجلاس چھوڑ کر جانا پڑا، چیئرمین قائمہ کمیٹی نے چیئرمین پی ٹی اے کی بدتمیزی کا معاملہ وزیراعظم کے سامنے اٹھانے کا فیصلہ کیا، اس کے علاوہ انہوں نے قائمہ کمیٹی کی سیکرٹری آئی ٹی کو بھی معاملے کا نوٹس لینے کی ہدایت کی۔ چیئرمین قائمہ کمیٹی آغا شاہزیب درانی نے کہا کہ ’چیئرمین پی ٹی اے کے رویہ کی مذمت کرتے ہیں، چیئرمین پی ٹی اے نے سینیٹر ایمل ولی کی ہی نہیں بلکہ پوری قائمہ کمیٹی کی توہین کی ہے، وزیراعظم چیئرمین پی ٹی اے کے خلاف ایکشن لیں۔