فچ نے پاکستان کی حقیقی شرح نمو 2027 تک 3.5 فیصد تک ہونے کی پیشگوئی کردی

اسلام آباد ( اردوپوائنٹ اخبار تازہ ترین۔ آئی پی اے ۔ 18 اگست 2025ء ) عالمی ریٹنگ ایجنسی فچ نے پاکستان کی حقیقی شرح نمو 2027 تک 3.5 فیصد تک ہونے کی پیشگوئی کردی ہے، رپورٹ میں کہا گیا کہ معاشی دباؤ کم اور کاروباری حالات بہتر ہوئے ہیں۔ میڈیا کے مطابق فچ کا اپنی رپورٹ میں کہنا ہے کہ پاکستان کا قرض منظرنامہ مضبوط ، معاشی دباؤ کم اور کاروباری حالات بہتر ہوئے ہیں، پاکستان کے بینکوں نے ریاستی اداروں کو بڑے قرض فراہم کئے ہوئے ہیں, بینکوں کی بڑی سرمایہ کاری حکومت کی سیکیورٹیز میں ہے، بینک کاروباری حجم بڑھانے کے مواقع سے فائدہ اٹھا سکتے ہیں۔

فچ نے کہا کہ پاکستان میں مشکل دور اور بلند افراط زر کے بعد معاشی بحالی آئی ہے۔ دوسری جانب وزیر خزانہ محمد اورنگزیب نے اسلام آباد میں میڈیا سے گفتگو کرتے ہوئے کہا کہ آئی ایم ایف کے اصلاحاتی ایجنڈے پر کام جاری ہے، اصلاحات کرنے سے برآمدات کی صلاحیت میں اضافہ ہوگا، اسی طرح ٹیرف ریفارمز بھی حکومت کے ترجیحی ایجنڈے میں شامل ہیں۔

(جاری ہے)

کیپیٹل مارکیٹس ڈویلپمنٹ کونسل بنانے جا رہے ہیں۔

اس ڈویلپنٹ کونسل کے اسٹیٹ بینک اور دیگر ادارے شراکت دار ہوں گے۔ وزیرخزانہ نے کہا کہ پاپولیشن، گروتھ اور موسمیاتی تبدیلی کے مسائل اور بچیاں اسکولوں سے باہر ہیں۔ اس معاملے پر ورلڈ بینک کی فنڈنگ آگئی ہے، ملک میں ان مسائل کے لئے فنڈنگ کی صلاحیت بڑھانے کی ضرورت ہے۔ وزیرخزانہ نے کہا کہ اس وقت ہم 37ویں پروگرام میں موجود ہیں، آئی ایم ایف ٹیم ستمبر میں پاکستان آئے گی۔

پاکستان کو آئی ایم ایف سے 13 لاکھ ڈالرز ملنے کا امکان ہے۔ مزید برآں وفاقی وزیر خزانہ محمد اورنگزیب نے کہا ہے کہ اسٹیٹ بینک ایکسچینج ریٹ اور شرح سود پر کام کررہا ہے، صورتحال مزید بہتر ہوگی۔ پاکستان ہندو کونسل کے تحت ایکسپو سینٹر کراچی میں ملازمت و تعلیمی ایکسپوکا افتتاح وفاقی وزیر خزانہ محمد اورنگزیب نے کیا۔ ایکسو میں مختلف اداروں اور کمپنیوں کی جانب سے طلبہ و طالبات کے لیے تقریبا 120اسٹالز لگائے گئے ہیں۔

جاب فیئر کے افتتاح کے بعد میڈیا سے گفتگو کرتے ہوئے وزیر خزانہ محمد اورنگزیب نے کہا کہ جاب فیئر پر سرکاری و نجی ادارے موجود ہیں، لیکن یہاں کارپوریٹ سیکٹر کی کمی محسوس ہوئی ہے۔ انہوں نے کہا کہ ٹیکنالوجی مستقبل کا راستہ ہے۔ نوجوان اپنے دل و دماغ سے کام کریں، بہترین کی جستجو رکھیں۔ انہوں نے کہا کہ کارپوریٹ سیکٹر کو آگے آنا ہوگا۔ شرح سود کو سنگل پوائنٹ ایجنڈا نہ بنائیں۔ نمو کا کوئی بٹن نہیں ہے، سوچ یہ ہے کہ نمو پائیدار ہو۔ حکومت کا کام ماحول فراہم کرنا ہے۔ پبلک پرائیویٹ پارٹنرشپ کامیابی سیکام کررہا ہے۔