مشرقی وسطی بحیرہ عرب میں کم دبا ئوبن گیا، کراچی میں معمول سے تیز سمندری ہوائیں چل پڑیں

جمعرات 22 مئی 2025 15:27

کراچی(اُردو پوائنٹ اخبارتازہ ترین - این این آئی۔ 22 مئی2025ء)مشرقی وسطی بحیرہ عرب میں کم دبائو بن گیا، سسٹم شمال کی طرف بڑھ کر 24 گھنٹوں میں ڈپریشن کی صورت اختیار کر سکتا ہے۔محکمہ موسمیات کے مطابق کم دبائو بننے کے سبب شہر میں معمول سے تیز سمندری ہوائیں چل پڑیں، ہوائوں کی رفتار 30.6 کلو میٹر (17 ناٹیکل مائل)فی گھنٹہ ریکارڈ کی گئی ۔

(جاری ہے)

دوپہر کے بعد ہوائوں کی رفتار میں مزید اضافہ دیکھا گیا اوررفتار 45 کلو میٹر(25ناٹیکل مائل) سے تجاوز کر گئی ۔

شہر کے مضافاتی علاقوں میں تیز گرد آلود ہوائیں چلنے کی بھی توقع ہے۔گزشتہ روز، محکمہ موسمیات کی جانب سے بیان جاری کیا گیا تھا کہ ہندوستان کے شمالی کرناٹک، گوا کے ساحلوں سے دور موجود سائیکلونک گردش بحیرہ عرب تک پھیلی ہوئی ہے، اس کے زیراثر اسی علاقے میں کم دبائو کا علاقہ بننے کا امکان ہے۔محکمہ موسمیات کا سائیکلون وارننگ سینٹر کراچی اس سسٹم کی قریب سے نگرانی کر رہا ہے۔