واشنگٹن میں اسرائیلی سفارتخانے کے دو اہلکاروں کو قتل کرنے والے ملزم پر فرد جرم عائد

جمعہ 23 مئی 2025 12:33

واشنگٹن (اُردو پوائنٹ اخبارتازہ ترین - اے پی پی۔ 23 مئی2025ء) امریکہ میں اسرائیلی سفارتخانے کے دو اہلکاروں کو گولی مار کر ہلاک کرنے والے شخص پر وفاقی عدالت نے فرسٹ ڈگری کے قتل کے دو الزامات کے تحت فردِ جرم عائد کر دی ہے۔اردو نیوز کے مطابق شکاگو سے تعلق رکھنے والے 31 سالہ امریکی شہری ایلیاس روڈریگیوز نے بدھ کی رات کو واشنگٹن میں امریکی جیویش کمیٹی کی تقریب میں شرکت کرنے والوں پر اس وقت فائرنگ کی جب وہ عمارت سے باہر نکل رہے تھے۔

ایلیاس روڈریگیوز پر دو افراد کے قتل کے علاوہ، غیر ملکی حکام کے قتل، اسلحے کا استعمال کرتے ہوئے قتل اور پرتشدد جرم میں اسلحے کے استعمال پر فرد جرم عائد کی گئی ہے۔قائم مقام اٹارنی جینین پیرو نے نیوز کانفرنس سے خطاب میں کہا کہ یہ سزائے موت کے مترادف کیس ہے اور اس کی مزید تفتیش نفرت پر مبنی جرم اور دہشت گردی کے جرم کے طور پر کی جائے گی۔

(جاری ہے)

عدالتی دستاویزات کے مطابق اایلیاس روڈریگیوز نے موقع پر ہی پولیس کو بتایاکہ میں نے فلسطین کے لیے کیا ہے۔ میں نے غزہ کے لیے کیا ہے۔عینی شاہدین کا کہنا ہے کہ ایلیاس روڈریگیوز کو جب پولیس نے حراست میں لیا تو انہوں نے ’فلسطین کو آزاد کرو‘ کا نعرہ لگایا۔فائرنگ سے 30 سالہ یارون لسچنسکی اور 26 سالہ سارہ لین ملگرم ہلاک ہوئی ہیں جو اسرائیلی سفارتخانے میں کام کرتے تھے۔