ڈپٹی کمشنرمیرپوریاسرریاض نے پانچ روزہ قومی انسداد پولیو مہم کا افتتاح کر دیا

مظفرآباد (اُردو پوائنٹ اخبارتازہ ترین - اے پی پی۔ 23 مئی2025ء) ڈپٹی کمشنرمیرپور یاسر ریاض اور ایس ایس پی خاور علی شوکت نے پانچ سال تک کی عمر کے بچوں کو پولیو ویکسین کے قطرے پلا کر پانچ روزہ قومی انسداد پولیو مہم کا افتتاح کر دیا۔ افتتاح کے موقع پرڈسٹرکٹ ہیلتھ آفیسر میرپور ڈاکٹر فدا حسین، ایڈیشنل پرنسپل میڈیکل آفیسر ڈاکٹر فاطمہ یعقوب، ڈاکٹر شمائلہ کرن ADHOڈڈیال، ڈسٹرکٹ انفارمیشن آفیسرمحمد جاوید ملک، ڈیزیز سرویلنس آفیسر ڈبلیو ایچ او میرپورڈاکٹر ارم، DIO،WHOمیرپورڈاکٹر نواب محمد مقصود، اسسٹنٹ کوآرڈینیٹر نیشنل پروگرام ڈاکٹر فاریہ جاوید، ڈاکٹرمحمد جنید سرویلنس آفیسر، محمد ریاض اسسٹنٹ ڈائریکٹر سرویلنس، وقاص احمد خان اسسٹنٹ ڈائریکٹرٹریننگ، عبدالوحید فوکل پرسن برائے پولیو مہم ضلع میرپور، نعمان شہزاد UCSP، محمد احسان ڈیٹا فوکل پرسن، غلام ربانی،ماجد اقبال یو سی ایم او، ایریا سپروائزر اور معززین شہر و عوامی نمائندگان، الیکڑانک و پرنٹ میڈیا کے نمائندگان علاوہ محکمہ صحت عامہ کے ملازمین بھی موجود تھے۔

(جاری ہے)

اس موقع پر ڈسٹرکٹ ہیلتھ آفیسر میرپور ڈاکٹر فد ا حسین نے ضلع میرپور میں پانچ روزہ قومی پولیو مہم کے حوالے سے بریفنگ دیتے ہوئے کہا کہ محکمہ صحت عامہ ضلع میرپور کی ٹیمیں پورے ضلع میں گھر گھر جا کر پانچ سال تک کی عمر کے تمام بچوں کو پولیو سے بچائو کے قطرے پلائیں گی نیز وٹامن اے کے قطرے بھی پلائے جائیں گے۔ انہوں نے کہا کہ پاکستان سمیت آزادکشمیر بھر میں پولیو سے بچائو کی مہم کو ایک قومی ومذہبی اور دینی فریضہ کی طرح ادا کرنا نہ صرف حکومت یا محکمہ صحت عامہ کی ذمہ داری ہے بلکہ ہر شہر ی اور تمام مکاتب فکر سے تعلق رکھنے والے افراد کا اس میں اپنا کردار ادا کرنا ضروری ہے تاکہ پانچ سال سے کم عمر کا کوئی بھی بچہ پولیو سے بچاؤ کے قطرے پینے سے محروم نہ رہے۔

انہوں نے کہا کہ پانچ روزہ مہم کے دوران ضلع میرپور میں پانچ سال تک کی عمر کے بچوں کو پولیو کے قطرے پلانے کے لئے ضلع میرپور کو انتالیس یونین کونسلز/وارڈزمیں تقسیم کر کے تربیت یافتہ سپروائزر مقرر کئے گئے ہیں۔ WHO کی ہدایت کے مطابق پولیو مہم کو کامیاب بنانے کے لئے میونسپل کارپوریشن میرپور مونسپل کمیٹی اسلام گڑھ،چکسواری اور میونسپل کمیٹی ڈڈیال کے ساتھ ساتھ ستائیس یونین کونسلز کی سطح پر ٹیموں کے نگرانی کے لئے 02 تحصیل سپروائزر 35یونین کونسل مانیٹرنگ آفیسر اور103یونین کونسلزوارڈزانچارج مقرر کئے گئے ہیں۔

ان انچارجز کی نگرانی میں پانچ سال تک کی عمر کے 76656 بچوں کو پولیو کے قطرے پلانے کے لئے 439 موبائل ٹیمیں اور مراکزصحت پر 41 فکسڈ سنٹرز مقرر کیے گئے ہیں نیز والدین کے ہمراہ سفر کرنے والے بچوں کے لئے 14 مختلف ضروری مقامات پر ٹرانزٹ پوائنٹس بھی بنائے گئے ہیں۔ انہوں نے عوام الناس سرکاری و نجی سکولز کی انتظامیہ سے اپیل کی ہے کہ گھروں اور سکولز میں آنے والی محکمہ صحت عامہ کی ٹیموں سے تعاون کرتے ہوئے پانچ سال تک کی عمر کے بچوں کو پولیو ویکسین اور وٹامن اے کے قطرے ضرور پلوائیں۔

ڈسٹرکٹ ہیلتھ آفیسر میرپور نے کہا کہ قبل ازیں ماضی میں میر پور کے داخلی و خارجی راستوں اور شہری و دیہی علاقوں میں پولیو ٹیمز فرض شناسی، محنت اور محکمہ صحت عامہ کی بہتر حکمت عملی کے ساتھ ساتھ عوامی تعاون سے پولیو مہم انتہائی کامیاب رہی۔ انہوں نے کہا کہ حکومت محکمہ صحت عامہ کی کامیاب حکمت عملی اور پولیو ٹیموں کی انتھک محنت کی وجہ سے ابھی تک آزادکشمیر میں کوئی پولیو کیس رپورٹ نہیں ہوا عوام الناس کے تعاون کے بغیر پولیو کا مکمل خاتمہ نہیں کیا جا سکتا اس مقصد کو حاصل کرنے کے لئے ہمیں محکمہ صحت عامہ کی پولیو ٹیموں سے بھر پور اور مکمل تعاون کرنا ہو گا ۔

ڈسٹرکٹ ہیلتھ آفیسر میرپور ڈاکٹر فدا حسین نے کہا کہ پولیو ٹیموں کی جانفشانی محنت اور فرض شناسی کے جذبوں کو بروئے کا رلاتے ہوئے 26 تا 30مئی2025ء پولیو کا سو فیصد ٹارگٹ حاصل کریں گے۔