ہزارہ یونیورسٹی میں شعبہ اردوکے زیرِ اہتمام ہزارہ کی خواتین افسانہ نگار کے موضوع پر سیمینارکاانعقاد

جمعہ 23 مئی 2025 20:10

مانسہرہ (اُردو پوائنٹ اخبارتازہ ترین - اے پی پی۔ 23 مئی2025ء) ہزارہ یونیورسٹی میں شعبہ اردوکے زیرِ اہتمام ہزارہ کی خواتین افسانہ نگار کے موضوع پر سیمینار منعقد ہوا۔سیمینار کا مقصد شعبہ اردو کی لیکچرر ڈاکٹر سیدہ رابعہ شاہ کے تازہ ہندکو افسانوی مجموعہ" سنبل" اور پی ایچ ڈی اردو کی اسکالر سمیہ زیب کے اردو افسانوی مجموعہ" خواب رنگ "کی تقریبِ پذیرائی تھا ۔

پروگرام کا آغاز تلاوت و نعتِ رسولِ مقبولؐ سے ہوا ۔تلاوت اور نعت کی سعادت شعبہ اردو کے طالبِ علم بالترتیب احمد فراز اور عباد اللّٰہ نے حاصل کی۔ نقابت کی ذمہ داری شعبہ اردو کے لیکچرر ڈاکٹر ازور شیرازی نے نبھائی۔ سیمینار کی صدارت ڈین کلیہ فنون پروفیسر ڈاکٹر شاکر اللّٰہ نے کی اور خطبہ استقبالیہ بھی پیش کیا ۔

(جاری ہے)

ڈین کلیہ فنون ،جامعہ ہزارہ نے اپنے خطاب میں فی زمانہ تعلیمی و تحقیقی منظر نامے پر روشنی ڈالتے ہوئے ادبی و تخلیقی صلاحیتوں کا انفراد بیان کیا اور دونوں افسانہ نگاروں کو کتب کی اشاعت پر مبارک باد پیش کرنے کے ساتھ ساتھ افسانوں کی ادبی جہات کو بھی نمایاں کیا ۔

مہمان مقررین میں نامور ناول نگار اور افسانہ نگار سید ماجد شاہ ،معروف دانش ور اور نقاد ڈاکٹر عامر سہیل اور شعبہ اردو ،شہید بے نظیر بھٹو وومن یونیورسٹی ،پشاور کی اسسٹنٹ پروفیسر ڈاکٹر راحیلہ خورشید تھیں ۔اول الذکر مقرر سید ماجد شاہ نے اپنی گفتگو میں فنِ افسانہ نگاری کی روایت اور محاسن پر غیر روایتی اور غیر معمولی گفتگو کی ۔ ڈاکٹر عامر سہیل نے سمیہ زیب کے افسانوی مجموعے خواب رنگ کے موضوعاتی،فنی ،تکنینکی اور لسانی پہلوؤں پر عالمانہ نکات پیش کیے۔

مہمان مقررین کی گفتگو کے بعد صاحبِ کتاب شخصیات ڈاکٹر سیدہ رابعہ شاہ اور سمیہ زیب نے سامعین سے خطاب کیا اور اپنے افسانوی سفر سے آگاہ کرنے کے علاوہ تقریب کے اہتمام پر صدرِ شعبہ اردو اور مقررین کا خصوصی شکریہ ادا کیا۔صدرِ شعبہ اردو نے ڈین آف آرٹس ،جامعہ ہزارہ اور تمام مہمان مقررین سمیت جامعہ کے دیگر شعبوں کے اساتذہ کرام اور طلبہ کا شکریہ ادا کیا ۔پروگرام میں ہزارہ ڈویژن کے تعلیمی اداروں کے اساتذہ اور اردو ادب کے طلبہ کی کثیر تعداد نے شرکت کی ۔