ماحولیاتی تبدیلی ایک ایسی عالمی حقیقت ہے جو کسی ایک ملک یا خطے تک محدود نہیں،مصدق ملک

اسلام آباد(اُردو پوائنٹ اخبارتازہ ترین - این این آئی۔ 24 مئی2025ء)وفاقی وزیر ماحولیاتی تبدیلی مصدق ملک نے کہاہے کہ سیاسی و ماحولیاتی اصولوں پر مبنی ایک نیا عالمی اتفاق رائے وقت کی اہم ضرورت ہے تاکہ امن، استحکام اور کرہ ارض کے تحفظ کو یقینی بنایا جا سکے، بین الاقوامی قوانین، عدم جارحیت، اور اصولی مکالمے کی بنیاد پر ہی دنیا ایک مستحکم اور پرامن مستقبل کی جانب بڑھ سکتی ہے۔

تفصیلا ت کے مطابق وفاقی وزیر ماحولیاتی تبدیلی اور ماحولیاتی ہم آہنگی مصدق ملک نے پاکستان انسٹیٹیوٹ برائے پارلیمانی خدمات (پی آئی پی ایس)میں منعقدہ ایک پینل سیشن بعنوان ’’اختلاف نہیں، مکالمہ: امریکہ پاکستان تعلقات میں تنازعات کا حل، سفارت کاری اور قانون کی حکمرانی‘‘میں شرکت کی۔

(جاری ہے)

یہ اجلاس سینئر سفارت کاروں، پالیسی ماہرین، اور حکومتی عہدیداران کی موجودگی میں منعقد ہوا، جس میں عالمی و علاقائی تنازعات کے پرامن حل اور اصولی سفارت کاری کی اہمیت پر سیر حاصل گفتگو کی گئی۔

پینل سے خطاب کرتے ہوئے وفاقی وزیر نے زور دیا کہ موثر سفارت کاری کی بنیاد باہمی ہمدردی، تفہیم اور نیک نیتی پر مبنی مکالمے پر ہونی چاہیے۔انہوں نے کہا کہ دیرپا امن کا قیام اسی صورت ممکن ہے جب اقوامِ عالم ایک دوسرے کے وقار کا احترام کریں اور تنازعات کے حل کو ترجیح دیں، نہ کہ بالادستی کو۔حالیہ پاکبھارت کشیدگی کا حوالہ دیتے ہوئے مصدق ملک نے کہا کہ پاکستان یکطرفہ جارحیت کا مسلسل نشانہ بنتا رہا ہے۔

انہوں نے واضح کیا کہ بھارت کی جانب سے نہ صرف شہری علاقوں کو نشانہ بنایا گیا بلکہ آبی تنصیبات پر بھی حملے کیے گئے، جن کے نتیجے میں معصوم شہریوں کی جانیں ضائع ہوئیں، ان حالات میں پاکستان کو مکمل حق حاصل تھا کہ وہ اسی شدت سے جواب دے، تاہم پاکستان نے بین الاقوامی ذمہ داری کا مظاہرہ کرتے ہوئے صرف فوجی اہداف تک اپنی کارروائی محدود رکھی۔

وفاقی وزیر نے اس امر کی نشاندہی کی کہ بھارت کی عسکری حکمت عملی اسرائیلی طرزِ فکر سے مماثلت رکھتی ہے، جسے جارحانہ دفاع کے اصول کے تحت نافذ کیا جا رہا ہے۔انہوں نے کہا کہ اس رویے کی جھلک عالمی سطح پر مختلف ریاستوں میں بھی دکھائی دیتی ہے، جو اپنی بالادستی قائم رکھنے کے لیے جارحیت کو تحفظ کا نام دیتی ہیں۔جوہری صلاحیت سے متعلق سوالات کا جواب دیتے ہوئے وزیر نے کہا کہ پاکستان کی دفاعی تیاری پر سوالات غیر ضروری ہیں۔

انہوں نے کہا کہ پاکستان نے ایک بار پھر ثابت کیا ہے کہ وہ کسی بھی جارحیت کا جواب روایتی عسکری ذرائع سے موثر انداز میں دینے کی مکمل صلاحیت رکھتا ہے، اور اس حوالے سے کسی ابہام کی گنجائش نہیں۔وفاقی وزیر نے واضح کیا کہ پاکستان کی اولین ترجیح علاقائی اور عالمی امن کا قیام ہے۔انہوں نے کہا کہ بین الاقوامی قوانین، عدم جارحیت، اور اصولی مکالمے کی بنیاد پر ہی دنیا ایک مستحکم اور پرامن مستقبل کی جانب بڑھ سکتی ہے۔

انہوں نے متنبہ کیاکہ اگر عالمی برادری نے بنیادی اصولوں کی پاسداری نہ کی تو موجودہ عالمی نظام انارکی کا شکار ہو جائے گا، اور دنیا ایک غیر یقینی اور خطرناک صورتحال سے دوچار ہو سکتی ہے۔ماحولیاتی بحران پر گفتگو کرتے ہوئے مصدق ملک نے کہا کہ ماحولیاتی تبدیلی ایک ایسی عالمی حقیقت ہے جو کسی ایک ملک یا خطے تک محدود نہیں۔انہوں نے کہا کہ جس طرح انسانیت کی اقدار سرحدوں سے بالا تر ہیں، اسی طرح ماحولیاتی تغیرات کے اثرات بھی عالمی سطح پر مشترکہ طور پر محسوس کیے جائیں گے،درجہ حرارت میں اضافہ، گلیشیئرز کا تیزی سے پگھلنا، اور موسمیاتی عدم استحکام، پوری دنیا کے لیے ایک اجتماعی خطرہ ہیں۔

انہوں نے زور دیا کہ سیاسی اور ماحولیاتی اصولوں پر مبنی ایک نیا عالمی اتفاق رائے وقت کی اہم ضرورت ہے تاکہ امن، استحکام اور کرہ ارض کے تحفظ کو یقینی بنایا جا سکے۔یہ پینل نشست پاکستان کی اس پالیسی کی عکاسی کرتی ہے جس کے تحت وہ ایک ذمہ دار ریاست کے طور پر عالمی سفارت کاری، انصاف، موسمیاتی اقدام، اور طویل المیعاد استحکام کے لیے اپنا موثر کردار ادا کرتا رہے گا۔