ہیمبرگ چاقو حملے کے تمام اٹھارہ زخمیوں کی حالت مستحکم

اسلام آباد (اُردو پوائنٹ ۔ DW اردو۔ 24 مئی 2025ء) ہیمبرگ سے ہفتہ 24 مئی کو ملنے والی رپورٹوں کے مطابق اس جرمن سٹی اسٹیٹ کے مرکزی ریلوے اسٹیشن پر کل جمعہ 23 مئی کی شام ایک خاتون نے چاقو سے حملے کر کے کم از کم 18 افراد کو زخمی کر دیا تھا۔ پولیس کے مطابق مشتبہ ملزمہ کی عمر 39 سال ہے۔ یہ خاتون جرمن شہری ہے اور اس وقت پولیس کی حراست میں ہے۔

جرمنی میں تخریب کاری کی روسی سازش: مقدمے کی سماعت شروع

اس حملے کے بعد پولیس نے بتایا تھا کہ مشتبہ ملزمہ کو اس کی طرف سے بغیر کسی مزاحمت کے گرفتار کر لیا گیا تھا۔ ہیمبرگ سے شائع ہونے والے اخبار 'ہامبرگر آبند بلاٹ‘ کے مطابق پولیس کی آمد سے پہلے موقع پر موجود دو افراد نے اس خاتون پر غلبہ پا کر اس سے اس کا چاقو چھین لیا تھا۔

(جاری ہے)

حملے کے بظاہر کوئی سیاسی محرکات نہیں

ابتدائی تفتیش کے اب تک موصولہ نتائج کے مطابق اس حملے کے بظاہر کوئی سیاسی محرکات نہیں اور یہ واقعہ ملزمہ کا انفرادی فعل تھا۔

مقامی پولیس نے بھی تصدیق کر دی ہے کہ فور طور پر ایسے کوئی اشارے یا شواہد نہیں ملے کہ مشتبہ ملزمہ نے یہ حملہ کسی سیاسی محرک کی وجہ سے کیا، ''اسے بظاہر کسی کی تائید و حمایت حاصل نہیں تھی۔

جرمنی: بچوں پر چاقو حملہ، مشتبہ افغان ملزم سے تفتیش جاری

تفتیشی ماہرین یہ پتہ چلانے کی کوشش میں ہیں کہ آیا ملزمہ ذہنی طور پر بیمار یا کسی بھی قسم کے نفسیاتی مسائل کا شکار ہے۔

ملزمہ کو، جس کا پولیس نے ڈیٹا پرائیویسی کے باعث نام ظاہر نہیں کیا، آج ہفتے کے روز ایک مقامی عدالت میں پیش کر دیا گیا۔ بعد میں اسے ممکنہ طور پر ایک نفسیاتی علاج گاہ میں منتقل کیا جانا تھا۔

چار افراد شدید زخمی

ہیمبرگ پولیس نے آج ہفتے کے روز بتایا کہ ملزمہ نے جن 18 افراد کو چاقو سے وار کر کے زخمی کر دیا تھا، ان میں سے چند ایک کو ابتدائی طبی امداد کے بعد ان کے گھروں کو بھیج دیا گیا تھا۔

باقی ماندہ تقریباﹰ ایک درجن افراد میں سے کسی کی بھی حالت تشویشناک نہیں اور وہ روبصحت ہیں۔

جرمنی: چاقو حملے میں دو افراد کی ہلاکت، مشتبہ شخص گرفتار

ہیمبرگ فائر بریگیڈ کے ترجمان فیلپ باؤمن نے نیوز ایجنسی اے پی کو بتایا کہ مشتبہ ملزمہ نے جن 18 افراد کو چاقو سے حملے کر کے زخمی کیا، ان کی عمریں 19 اور 85 برس کے درمیان ہیں۔

ان میں سے 24، 52 اور 85 برس کی عمروں کی تین خواتین اور ایک 24 سالہ مرد شدید زخمی ہیں، جن کا علاج جاری ہے۔ تاہم ان چاروں کی حالت بھی مستحکم ہے اور ان کی جانیں خطرے میں نہیں۔

ہتھیار رکھنے کی قانونی ممانعت

مشتبہ ملزمہ نے ہیمبرگ کے سینٹرل ریلوے اسٹیشن کے ٹریک نمبر 13 اور 14 کے درمیانی پلیٹ فارم پر جمعے کی شام چھ بجے وہاں موجود افراد پر چاقو سے اچانک حملے کرنا شروع کر دیے تھے۔

جرمنی میں بڑھتے چاقو حملے، بڑی سیاسی جماعتوں کا اجلاس

یہ اسٹیشن ہیمبرگ شہر کے بہت مصروف وسطی علاقے میں واقع ہے۔ جرمنی کے دوسرے سب سے بڑے شہر ہیمبرگ میں یہ مقامی، علاقائی اور طویل فا‌صلے تک سفر کرنے والی ریل گاڑیوں والا بہت مصروف اسٹیشن ہے۔

ہیمبرگ میں اس ریلوے اسٹیشن کی حدود میں تیز دھار آلوں سمیت کسی بھی طرح کے ہتھیار اپنے پاس رکھنے پر پابندی ہے اور مقامی پبلک ٹرانسپورٹ کے ذریعے سفر کے دوران بھی اپنے پاس کسی بھی قسم کا کوئی ہتھیار رکھنا قانوناﹰ ممنوع ہے۔

ادارت: شکور رحیم