ایک ہی دن میں تیسری مرتبہ شدید زلزلہ

خیبرپختونخواہ کے سوات ریجن میں ایک ہی دن میں 3 مرتبہ شدید زلزلے نے خوف و ہراس پھیلا دیا

محمد علی بدھ 6 اگست 2025 23:08

سوات (اُردو پوائنٹ اخبارتازہ ترین۔ 06 اگست2025ء) ایک ہی دن میں تیسری مرتبہ شدید زلزلہ، خیبرپختونخواہ کے سوات ریجن میں ایک ہی دن میں 3 مرتبہ شدید زلزلے نے خوف و ہراس پھیلا دیا۔ تفصیلات کے مطابق بدھ کے روز سوات اور گرد و نواح میں ایک ہی دن کے دوران زلزلے کے تین جھٹکے محسوس کیے گئے جس سے عوام میں خوف و ہراس پھیل گیا۔ زلزلے کے باعث کسی قسم کے جانی یا مالی نقصان کی اطلاع موصول نہیں ہوئی، تاہم شہری شدید خوف کا شکار رہے۔

(جاری ہے)

زلزلہ پیما مرکز کے مطابق پہلا زلزلہ 4.7 شدت کے ساتھ ریکارڈ کیا گیا، جس کی زیر زمین گہرائی 61 کلومیٹر رہی۔ دوسرا زلزلہ 4.3 شدت کا تھا اور اس کی گہرائی 191 کلومیٹر تھی، جبکہ تیسرے زلزلے کی شدت دوبارہ 4.7 ریکارڈ کی گئی اور اس کی گہرائی 79 کلومیٹر رہی۔ تینوں زلزلوں کا مرکز کوہِ پموکش کا پہاڑی سلسلہ بتایا گیا ہے، جو افغانستان، پاکستان اور تاجکستان کے سنگم پر واقع ہے اور زلزلہ خیز علاقہ تصور کیا جاتا ہے۔ واضح رہے کہ اس سے قبل گزشتہ ہفتے بھی جمعہ اور ہفتہ کے روز مسلسل 2 دن ملک کے کئی علاقوں میں زلزلے کے شدید جھٹکے محسوس کیے گئے تھے۔