نوشکی ، نامعلوم افراد کی پولیو ٹیم پر فائرنگ ، پولیس اہلکار شہید

نوشکی(اردوپوائنٹ اخبار تازہ ترین۔27 مئی 2025)نوشکی میں نامعلوم افراد کی پولیو ٹیم پر فائرنگ سے پولیس اہلکار شہید ہوگیا، واقعہ کی اطلاع ملتے ہی ریسکیو اہلکار اور پولیس کی نفری موقع پر پہنچ گئی، ریسکیو اہلکاروں نے لاش کو ہسپتال منتقل کر دیا، بتایا گیا ہے کہ بلوچستان کے علاقے نوشکی میں کلی محمد حسنی کے قریب پولیو ٹیم ڈیوٹی دے رہی تھی کہ اچانک نامعلوم افراد نے پولیو ٹیم پرفائرنگ کردی جس کے نتیجے میں پولیس اہلکار موقع پر ہی دم توڑگیا۔

پولیس کے مطابق علاقے کو گھیرے میں لیکر ملزمان کی گرفتاری کیلئے سرچ آپریشن شروع کر دیا گیا ہے ۔دوسری جانب خیبرپختونخوا ہ کے ضلع ٹانک میں تین روزہ انسداد پولیو مہم کے دوران نامعلوم افراد نے انسداد پولیو ٹیم کے دو کارکنان کو اغوا کر لیا گیا۔

(جاری ہے)

پولیس ذرائع کے مطابق دونوں ہیلتھ ورکرز ڈیوٹی پر تھے کہ نامعلوم مسلح افراد نے انہیں اغوا کر لیا اور نامعلوم مقام پر لے گئے۔

پولیو ورکرز ٹانک کے علاقے دولات کورنا میں جاری ویکسینیشن مہم کے ایک حصے کے طور پر اپنی ذمہ داریاں انجام دے رہے تھے۔ مغوی ورکرز کی شناخت یونین کونسل کے اہلکار صفت خان اور ان کے ساتھی حزب اللہ کے طور پر ہوئی۔واقعے کے فوری بعد پولیس نے اطراف کے علاقوں میں مغوی اہلکاروں کی بازیابی کیلئے سرچ آپریشن شروع کردیاہے۔دوسری جانب لاہور سمیت پنجاب بھر میں سال کی تیسری قومی انسداد پولیو مہم کا آج دوسرا روز تھا۔

دو لاکھ سے زائد پولیو ورکرز حصہ لے رہے تھے۔مہم کے تحت دو کروڑ تیس لاکھ بچوں کو ویکسین دی جائے گی، لاہور، راولپنڈی اور فیصل آباد میں مہم سات جبکہ باقی اضلاع میں پولیو مہم 5 دن تک جاری رہے گی۔پولیو ورکرز کا کہنا تھا والدین تعاون کریں، پانچ سال سے کم عمر بچوں کو لازمی پولیو سے بچاو کے قطرے پلائیں، ماہرینِ اطفال نے بچوں کو پولیو کے قطرے پلانے پر زور دیتے ہوئے کہا والدین پولیو ٹیموں سے بھرپور تعاون کریں۔

واضح رہے کہ گزشتہ روزملک بھر میں 2025 کی تیسری انسادا پولیو مہم شروع ہوگئی تھی۔ یکم جون تک جاری مہم میں 4 کروڑ 58 لاکھ بچوں کو پولیو سے بچاو کے قطرے پلانے کا ہدف مقرر کیا گیا تھا۔بتایا گیا تھا کہ سات روزہ مہم میں لاہور سمیت پنجاب میں 2 کروڑ 30 لاکھ، بلوچستان میں 36 لاکھ اور خیبرپختونخوا میں70 لاکھ سے زائد بچوں کو انسداد پولیو ویکسین پلائی جائیں گی۔

وفاقی وزیر صحت مصطفیٰ کمال نے نیشنل ایمرجنسی آپریشنز سینٹر اسلام آباد میں نیوز کانفرنس میں والدین سے اپیل کی کہ وہ اس قومی مہم کا حصہ بنیں اور اپنے بچوں کو مستقل معذوری سے بچائیں۔وفاقی وزیر صحت مصطفیٰ کمال کا کہنا تھا کہ خدا کا واسطہ ہے والدین یہ بات سمجھیں کہ یہ ان کے بچوں کی بہتری تھی۔ مہم میں کوئی سازش نہیں، والدین منفی باتیں ذہن سے نکال کر بچوں کو پولیو سے بچائیں کیوں کہ کینسر کا علاج ہے لیکن پولیو لاعلاج تھا۔