یونائیٹڈ بزنس گروپ تاجروں کے مسائل کے حل کیلئے ہرممکن کوشش کررہا ہے ،ایس ایم تنویر

کوئٹہ(اُردو پوائنٹ اخبارتازہ ترین - این این آئی۔ 27 مئی2025ء) یونائیٹڈ بزنس گروپ کے رہنماوں نے کہا ہے کہ یونائیٹڈ بزنس گروپ تاجروں کے مسائل کے حل کیلئے ہرممکن کوشش کررہا ہے بلوچستان کے تاجروں کو درپیش مسائل کے حل کیلئے ہر فورم پر آواز بلند کی جائے گی ،آئندہ بلوچستان کے دورے کے موقع پر چمن چیمبر کا دورہ کریں گے ، سابق گورنر کے کوئٹہ میں فلاحی اداروں اور اسکولزکے قیام کی تجویز کا خیرمقدمہ کرتے ہیں۔

یہ بات یونائیٹڈ بزنس گروپ کے پیٹرن چیف ایس ایم تنویر،سابق گورنر بلوچستان ملک عبدالولی کاکڑ،فیڈریشن آف پاکستان کے رہنما عتیق اکرام شیخ ،ایف پی سی سی آئی کے سابق صدرحاجی دارو خان اچکزئی،چمن چیمبر آف کامرس کے صدر حاجی عبدالنافع جان اچکزئی،چمن چیمبر کے ایگزیکٹو ممبر علاؤ الدین اچکزئی ،ہمایوں اچکزئی ایڈووکیٹ ،میروائس خان اچکزئی نے چمن چیمبر آف کامرس کی جانب سے حاجی جمال الدین اچکزئی مرحوم کی رہائش گاہ پریونائیٹڈ بزنس گروپ کے عہدیداروں کے اعزاز میں دیئے گئے عصرانے سے خطاب کررہے ہیںاس موقع پر سابق نگران وزیراعلیٰ بلوچستان علاؤ الدین مری ، سابق ارکان اسمبلی سید لیاقت آغا،ملک نصیرشاہوانی ،چیمبر آف کامرس کے حاجی جمعہ خان نورزئی ، حاجی ولی نورزئی ،فاروق خلجی ،اختر خان کاکڑاوردیگر رہنما بھی موجود تھے۔

(جاری ہے)

یونائیٹڈ بزنس گروپ کے پیٹرن چیف ایس ایم تنویراور عتیق اکرام شیخ نے کہا کہ یونائیٹڈ بزنس گروپ نے ہمیشہ پاکستان بھر کے تاجروں کے مسائل کے حل کیلئے ہرفورم پر آواز بلندکی ہے بلوچستان کے تاجر بھی ہمارے بھائی ہیں انکو درپیش مسائل کے حل میں اپناکردارادا کریںگے۔انہوں نے کہا کہ ہم آئندہ بلوچستان کے دورے کے دوران چمن کا بھی دورہ کریں گے۔

انہوں نے کہا کہ سابق گورنر بلوچستان ملک عبدالولی کاکڑکی جانب سے فلاحی اداروں کے قیام کی تجویز کا خیرمقدم کرتے ہیں چیمبر آف کامرس کے عہدیداران کاروبار کے ساتھ ساتھ عوام سے بھی رابطے رکھیں۔سابق گورنر بلوچستان ملک عبدالولی کاکڑ نے کہا کہ ملک کے دیگر صوبوں میں چیمبر آف کامرس کے عہدیداران فلاحی ادارے چلارہے ہیں لیکن بلوچستان میں چیمبر آف کامرس کی جانب سے کوئی بھی فلاحی ادارہ آج تک قائم نہیں کیا گیا ہے چیمبر آف کامرس کے عہدیداروں اور ممبران کو چاہئے کہ وہ فلاحی کاموں میں بھی بڑھ چڑھ کرحصہ لیں۔

حاجی دارو خان اچکزئی ، حاجی عبدالنافع جان اچکزئی ، علاؤ الدین اچکزئی ، ہمایوں ایڈووکیٹ ،میروائس اچکزئی نے کہا کہ ہم یونائیٹڈ بزنس گروپ کے عہدیداروں کو کوئٹہ آمد پر خو ش آمدید کہتے ہیں اورانہیں چمن چیمبر آف کامرس کے دورے کی دعوت دیتے ہیں۔ انہوں نے کہا کہ ہم نے ہمیشہ یونائیٹڈ بزنس گروپ کا ساتھ دیا ہے اور امید رکھتے ہیں کہ یونائیٹڈ بزنس گروپ ہمیں اعتماد میں لیکر فیصلے کریگا۔