Live Updates

65 ہزارسے زائد حجاج حج سے محروم رہ گئے، حکومت ذمہ داران کیخلاف کارروائی کری: حج آرگنائزرز ایسوسی ایشن

منگل 27 مئی 2025 23:08

لاہور (اُردو پوائنٹ اخبارتازہ ترین - آن لائن۔ 27 مئی2025ء) لاہور چیمبر آف کامرس اینڈ انڈسٹری اور حج آرگنائزرز ایسوسی ایشن نے ایک ہنگامی پریس کانفرنس میں کہا ہے کہ افسر شاہی کی نااہلی اور رکاوٹوں کی وجہ سے 65ہزار سے زائد حجاج حج سے محروم رہ گئے، حکومت ذمہ داران کے خلاف فوری کارروائی کرے۔ پریس کانفرنس سے صدر لاہور چیمبر میاں ابوذر شاد، سینئر نائب صدر انجینئر خالد عثمان، نائب صدر شاہد نذیر چوہدری، ایگزیکٹو کمیٹی رکن منظور حسین جعفری، چیئرمین پنجاب حج عمرہ آپریٹرز ایسوسی ایشن چودھری عادل صبور، عبدالجبار انجم، علی عمران، اویس جمیل، خواجہ سہیل اور دیگر نمائندگان نے خطاب کیا۔

پریس کانفرنس کے شرکاء نے شدید افسوس کا اظہار کرتے ہوئے کہا کہ سرکاری بیوروکریسی کی تاخیر، غیر ضروری پیچیدگیوں اور ناقص پالیسی سازی کی وجہ سے اس سال نجی حج اسکیم کے تحت رجسٹرڈ 65 ہزار سے زائد پاکستانی مقدس فریضہ حج ادا کرنے سے محروم رہ گئے۔

(جاری ہے)

انہوں نے بتایا کہ سعودی حکومت نے حج 2025 کے لیے 28 جون 2024 کو پالیسی کا اعلان کر دیا تھا جبکہ پاکستان کی وزارت مذہبی امور نے دانستہ تاخیر سے 27 نومبر 2024 کو پالیسی منظور کرائی جس کے سبب تقریباً پانچ ماہ ضائع ہو گئے۔

شرکاء نے اس سنگین غفلت پر متعلقہ افسران کے خلاف فوری کارروائی کا مطالبہ کیا۔اس موقع پر یہ وضاحت بھی کی گئی کہ تمام متاثرہ حجاج کی رقوم سو فیصد محفوظ ہیں۔ اگر وہ 2026 میں حج پر جانا چاہیں تو بغیر کسی اضافی چارجز کے یہی رقم استعمال ہوگی، حتیٰ کہ پیکیج کی قیمت بڑھنے کی صورت میں بھی متاثرہ افراد سے اضافی رقم وصول نہیں کی جائے گی۔ تاہم اگر کوئی حاجی رقم کی واپسی چاہے تو مقررہ طریقہ کار کے تحت رقوم واپس کر دی جائیں گی۔

صدر لاہور چیمبر میاں ابوذر شاد ، سینئر نائب صدر انجینئر خالد عثمان اور نائب صدر شاہد نذیر چودھری نے اپنے خطاب میں کہا کہ مذہبی فریضہ حج کی ادائیگی کے لیے نجی شعبے کی کوششوں کو سراہا جانا چاہیے نہ کہ بیوروکریسی کی نااہلی کے باعث اسے نقصان پہنچایا جائے۔ انہوں نے حکومت سے مطالبہ کیا کہ نجی حج اسکیم کے نظام کو بہتر بنانے کے لیے متعلقہ اسٹیک ہولڈرز کو مشاورت میں شامل کیا جائے اور آئندہ ایسی صورتحال سے بچنے کے لیے ٹھوس اصلاحات کی جائیں۔