ْسنی تحریک کے ملک بھر کے ذمہ داران کو یوم تکبیر کے موقع پرملک بھر میں جشن منانے کی ہدایت

بدھ 28 مئی 2025 04:05

کراچی (اُردو پوائنٹ اخبارتازہ ترین - این این آئی۔ 28 مئی2025ء)پاکستان سنی تحریک کے چیئرمین انجینئر محمد ثروت اعجاز قادری مرکزی صدر صاحبزادہ علامہ بلال عباس قادری اور مرکزی سیکرٹری جنرل صاحبزادہ علامہ بلال سلیم قادری کا یوم تکبیر کے موقع پر ملک بھر میں جشن منانے کا اعلان۔پاکستان سنی تحریک کے مرکزی رہنماں نے تمام ذمہداران عہدے داران اور کارکنان کو ہدایت کی ہے کہ ملک بھر میں یوم تکبیر کے موقع پر ریلیاں جلوس سیمینار کا اہتمام کریں۔

28 مئی کو پاکستان اسلام کی پہلی ایٹمی قوت کے طورپر ابھرا۔ یہ وہ دِن ہے جس دِن پاکستان کا دفاع ناقابل تسخیر ہوگیا اور جنوبی ایشیا میں طاقت کا توازن قائم ہوگیا۔ پاکستان سنی تحریک کے چیئرمین انجینیئر محمد ثروت اعجاز قادری نے یوم تکبیر کے حوالے سے اپنے جاری بیان میں کہا کہ 11مئی 1998 کو بھارتی ایٹمی دھماکوں نے جہاں ہمسایہ ملک کے جارحانہ عزائم کو مکمل طور پر بے نقاب کر دیا وہاں خطے میں طاقت کے توازن اور امن کو بھی شدید دھچکا پہنچا۔

(جاری ہے)

وطنِ عزیز کے دفاع اور سلامتی کا تقاضہ تھا کہ تمام تر مصلحتوں اور دبا کو بالائے طاق رکھتے ہوئے ملکی مفاد کے پیش نظر مشکل فیصلے کئے جائیں۔یکطرفہ عالمی دبا کو خاطر میں لائے بغیر28مئی 1998کو بھارتی دھماکوں کے جواب میں پانچ ایٹمی دھماکے کرکے پاکستان کے دفاع کو ناقابل تسخیر بنادیا۔اِس دن ہماری قیادت نے دنیا کو یہ باور کرا دیا کہ وطن کے دفاع کو ناقابلِ تسخیر بنانے اور اسے بیرونی جارحیت سے محفوظ رکھنے کے سلسلے میں کوئی سمجھوتا نہیں کیا جائے گا۔

مرکزی صدر پاکستان سنی تحریک صاحبزادہ علامہ بلال عباس قادری نے کہا کہ یوم تکبیر ہمیں موقع فراہم کرتا ہے کہ اس دن ہم پاکستان کے دفاع اور سلامتی کے عہد کی تجدید کریں۔یہ دن اس عہد کی تجدید کا بھی لمحہ ہے کہ ہم ملکی سالمیت اور تعمیر و ترقی کے فیصلوں میں ہمیشہ قومی مفاد کو مد نظر رکھیں۔28مئی 1998کوملکی سیکیورٹی اور امن و امان کی صورتحال میں واضح بہتری آئی ہے معاشی شعبے میں بھی ملک کوترقی کی راہ پر گامزن کیا گیا ہے۔

مرکزی سیکرٹری جنرل پاکستان سنی تحریک صاحبزادہ علامہ بلال سلیم قادری کا کہنا تھا کہ 28 مئی کو ملک کی تعمیر و ترقی کی ایک ایسی مضبوط بنیاد رکھی گئی ہے جس پر مستقبل میں تعمیر ہونے والی عمارت ملک و قوم کو اقوام عالم میں سرخرو کرنے میں معاون و مددگار ثابت ہوگی۔اللہ تعالی کی نصرت اور عوام کی تائید سے پاکستان کو ناقابلِ تسخیر بنانے اور اسے ترقی یافتہ ملکوں کی صف میں لانے کا سفر جاری و ساری رہے گا۔