Live Updates

بھارت، پاکستان کے ساتھ بنیادی مسائل کو مذاکرات کے ذریعے حل کرنے کے موقع سے فائدہ اٹھائے، افتخار علی ملک

بدھ 28 مئی 2025 16:32

لاہور (اُردو پوائنٹ اخبارتازہ ترین - اے پی پی۔ 28 مئی2025ء) سارک چیمبر آف کامرس اینڈ انڈسٹری کے سابق صدر افتخار علی ملک نے کہا ہے کہ بھارت، پاکستان کے ساتھ بنیادی مسائل کو مذاکرات کے ذریعے حل کرنے کے موقع سے فائدہ اٹھائے اور دائمی دشمنی کے بیانیہ کو پائیدار امن، ترقی اور خوشحالی کے بیانیے سے تبدیل کرے۔ بدھ کو یہاں ایک بیان میں انہوں نے کہا کہ یہ صرف سفارتی ضرورت نہیں بلکہ یہ اخلاقی، معاشی اور انسانی ضرورت ہے۔

تاریخ اس بات کی گواہ ہے کہ محاذ آرائی صرف تباہی اور انسانی المیہ لے کر آتی ہے جبکہ مذاکرات اور بات چیت سے مفاہمت، استحکام اور مشترکہ پیش رفت کا راستہ نکلتا ہے۔ انہوں نے کہا کہ بھارت کو اشتعال انگیز بیان بازی اور کارروائیوں سے باز رہنا چاہیے جن سے بداعتمادی اور نفرت کو ہوا ملتی ہے۔

(جاری ہے)

بھارت کے میڈیا، سول سوسائٹی اور سیاسی قیادت کی مشترکہ ذمہ داری ہے کہ وہ کشیدگی کے بجائے امن کے بیانیے کو فروغ دیں۔

افتخار علی ملک نے کہا کہ بھارت کو اس بات کا ادراک کرنا ہوگا کہ جنگیں پیچیدہ سیاسی اور علاقائی تنازعات کا حل نہیں ہیں بلکہ ان کا حل صرف مذاکرات سے ہی نکل سکتا ہے۔ اس لئے قابل عمل حل صرف ایک ہے کہ وہ مذاکرات کی میز پر آئے اور تمام تصفیہ طلب امور کو حل کرنے کیلئے بات چیت کا آغاز کرے۔