مئی 1998 کا دن تاریخ کا سنہرا باب ،ملک نے ایٹمی قوت بن کر دفاع کو ناقابلِ تسخیر بنا دیا،مشیربلدیات نوابزادہ امیر حمزہ زہری

بدھ 28 مئی 2025 17:20

کوئٹہ (اُردو پوائنٹ اخبارتازہ ترین - این این آئی۔ 28 مئی2025ء) مشیر برائے بلدیات بلوچستان نوابزادہ امیر حمزہ خان زہری نے کہا ہے کہ 28 مئی 1998 کا دن پاکستانی تاریخ کا ایک سنہرا باب ہے جب ملک نے ایٹمی قوت بن کر اپنے دفاع کو ناقابلِ تسخیر بنا دیا۔

(جاری ہے)

بدھ کو یومِ تکبیر کے موقع پر اپنے خصوصی پیغام میں انہوں نے کہا کہ یومِ تکبیر ہمیں اس عزم و ہمت کی یاد دلاتا ہے جو پاکستان نے قومی سلامتی اور خودمختاری کے تحفظ کے لیے دکھایا "یہ دن ہمیں اس قربانی اور استقلال کی یاد دلاتا ہے جو ہمارے سائنسدانوں، افواجِ پاکستان، اور قومی قیادت نے ملک کے دفاع کو ناقابلِ تسخیر بنانے کے لیے دی۔

نوابزادہ امیر حمزہ خان زہری نے کہا کہ آج کے دن ہمیں تجدیدِ عہد کرنا ہوگا کہ ہم ملکی استحکام، ترقی اور خودداری کے لیے اسی جذبے سے کام کرتے رہیں گے۔ انہوں نے کہاکہ بلوچستان کے عوام نے ہمیشہ ملکی یکجہتی، امن اور دفاع میں اہم کردار ادا کیا ہے اور آئندہ بھی اسی جذبے کے تحت قومی ترقی میں اپنا کردار ادا کرتے رہیں گے ۔انہوں نے نوجوان نسل کو مخاطب کرتے ہوئے کہا کہ وہ علم، ٹیکنالوجی اور حب الوطنی کے جذبے سے لیس ہو کر ملک کو درپیش چیلنجز کا مقابلہ کریں اور پاکستان کو ایک مضبوط، خوشحال اور خوددار ریاست بنانے میں اپنا بھرپور کردار ادا کریں۔