حکومت نے بجلی کی قیمتوں میں کسی قسم کاکوئی اضافہ نہیں کیا، وفاقی وزیرتوانائی

اسلام آباد (اُردو پوائنٹ اخبارتازہ ترین - اے پی پی۔ 29 مئی2025ء) وفاقی وزیر توانائی سرداراویس احمد خان لغاری نے بجلی کی قیمتوں میں کسی قسم کے اضافے کی خبروں کی سختی سے تردید کرتے ہوئے کہا ہے کہ حکومت نے بجلی کی قیمتوں میں کسی قسم کاکوئی اضافہ نہیں کیا، بجلی کے ایک کروڑ 80 لاکھ صارفین کے لیے قیمتوں میں 50فی صد تک کمی کی گئی ، اگلے تین برس میں گرڈ سے فراہم کرنے کے لئے وافر بجلی موجود ہے،گزشتہ ایک سال سے پاور سیکٹر میں کی گئی اہم اصلاحات کے ذریعے حکومت نے صارفین کو ریلیف فراہم کرنے کی کوشش کی ہے،گزشتہ ایک سال میں صنعتی شعبے کا ٹیرف 30 فیصد کم کیا گیا ہے،حکومت کی کوشش ہے کہ پاور ٹیرف میں پائیدار بنیاد پر کمی کی جائے ۔

ان خیالات کا اظہار وفاقی وزیر نے جمعرات کو ’’بجلی کے شعبے میں تبدیلیوں پر ورکشاپ ‘‘ سے خطاب کرتے ہوئے کیا ۔

(جاری ہے)

سردار اویس احمد خان لغاری نے کہا کہ پاکستان میں متبادل ذرائع توانائی کا انقلاب آ چکا ہے ،ایک سال سے ہم توانائی کےشعبے میں تحقیق اور مختلف چیزوں کا تجزیہ کر رہے ہیں ، آئی پی پیز سے معاہدوں پر نظرثانی کر رہے ہیں ، بجلی کی قیمتوں میں کمی آئی ہے ۔

انہوں نے مزید کہاکہ شمسی توانائی کا ذریعہ حیران کن ہے ، حالیہ برسوں میں شمسی تونائی کی پیداوار میں اضافہ ہوا ہے ۔ اویس لغاری نے کہاکہ ماضی میں توانائی کے شعبے میں اندازے حقیقت پسندانہ نہیں تھے ، حکومت کی کوشش ہے پاورٹیرف میں پائیدار بنیاد پر کمی کی جائے، پاکستان میں متبادل ذرائع توانائی کا انقلاب آچکا ہے، کورونا وا ئرس کی عالمگیر وبا کے دنوں میں توانائی کی مانگ میں اضافہ ہوا ، مستقبل میں حکومت کو بجلی کی خریداری سے الگ کرنے کی کوشش کر رہے ہیں ، بجلی کے نظام میں بھاشا ڈیم کی شمولیت اہم ہوگی ۔

وفاقی وزیر نے کہاکہ کوشش کر رہے ہیں صارفین کو بجلی کے نظام میں ناقص منصوبہ بندی کا سامنا نہ کرنا پڑے ، ٹرانسمیشن کے نظام میں اصلاحات ہورہی ہیں ، ٹرانسفارمرز اور فیڈرز پر دبائو سے متعلق معلوم کرنے کے حوالے سے ہمارے پاس جدید ٹیکنالوجی نہیں ہے ، پاکستان میں متبادل ذرائع توانائی کا انقلاب آچکا ہےشمسی توانائی کی پیداوار میں اضافہ ہوا ہے، کوئلے اور گیس پر چلنے والے بجلی گھروں کے حوالے سے کوشش ہے کہ ماحولیات پر اثر نہ پڑے ۔

ایک سوال کے جواب میں وفاقی وزیر نے کہا کہ وفاقی کابینہ کے احکامات پر نیٹ میٹرنگ کی پالیسی پر ازسرنو غور کیا ہے ، اس حوالے سے سٹیک ہولڈرز سے مشاورت کی جائے گی اور رائے بھی لی جائے گی ، جس کے بعد کابینہ کی منظوری کے بعد پالیسی لاگو ہو جائے گی ، انڈسٹری کے لئے بجلی کی قیمتیں 30 سے 32 فیصد کم ہوئی ہیں اور تقریبا ایک کروڑ 80 لاکھ کنزیومرز کے لئے 50 فیصد کم ہوئی ہیں ۔ ایک اور سوال کے جواب میں وفاقی وزیر نے بجلی کی قیمتوں میں کسی قسم کے حالیہ اضافے کی خبروں کی سختی سے تردید کی اور واضح کیاکہ یہ اضافہ محض ماہانہ فیول ایڈجسٹمنٹ کی مد میں ہے جوکہ ایک معمول کا حصہ ہے اور حکومت نے بجلی کی قیمتوں میں کسی قسم کاکوئی اضافہ نہیں کیا۔