سکیورٹی فورسز کی بلوچستان میں کارروائیاں، فتنہ الہندوستان کے 5 دہشتگرد ہلاک کردیئے گئے

سکیورٹی فورسز نے لورالائی اور ضلع کیچ میں دہشتگردوں کے خلاف کارروائیاں کیں، بھارتی سرپرستی میں سرگرم دہشتگرد قانون نافذ کرنے والے اداروں کو انتہائی مطلوب تھے۔ آئی ایس پی آر

ثنااللہ ناگرہ جمعرات 29 مئی 2025 20:45

سکیورٹی فورسز کی بلوچستان میں کارروائیاں، فتنہ الہندوستان کے 5 دہشتگرد ..

راولپنڈی ( اردوپوائنٹ اخبار تازہ ترین۔ آئی پی اے ۔29 مئی 2025ء ) سکیورٹی فورسز نے 28 مئی کو بلوچستان میں 2 کارروائیاں کیں، بھارتی پراکسی تنظیم فتنہ الہندوستان کے 5 دہشتگرد ہلاک کردیئے گئے۔

(جاری ہے)

پاک فوج کے شعبہ تعلقات عامہ آئی ایس پی آر کے مطابق سکیورٹی فورسز نے بلوچستان میں کارروائیوں میں فتنہ الہندوستان کے 5 دہشتگرد ہلاک کردیئے، سکیورٹی فورسز کی لورالائی میں کاروائی کے دوران شدید فائرنگ کے تبادلے میں 4 دہشتگرد مارے گئے۔

دہشتگردوں کے قبضے سے اسلحہ اور گولہ بارود اور دھماکہ خیز مواد برآمد ہوا ہے، ہلاک دہشتگرد متعدد دہشتگردی کی کارروائیوں میں ملوث تھے۔ سکیورٹی فورسز نے ضلع کیچ میں بھی کارروائی کی۔ کارروائی میں ایک دہشتگرد مارا گیا۔ ہلاک دہشتگرد 26 اگست 2024 اور 18 فروری 2025 کو این 70پرشام کے قریب حملے میں شامل تھے۔ بھارتی سرپرستی میں سرگرم دہشتگرد قانون نافذ کرنے والے اداروں کو انتہائی مطلوب تھے۔