ہم جوہری ہتھیار کے حصول کی کوشش نہیں کر رہے ہیں،ایرانی صدر

جمعہ 30 مئی 2025 21:47

تہران (اُردو پوائنٹ اخبارتازہ ترین - آن لائن۔ 30 مئی2025ء) ایرانی صدر مسعود پزشکیان نیکہا ہے کہ کوئی بھی ایران کو یورینیم کی افزودگی سے نہیں روک سکتا۔ العربیہ کے مطابق انھوں نے گزشتہ روز عمانی ٹیلی ویڑن کے ساتھ گفتگو کے دوران کہا کہ ایران ایسے تمام دباؤ کو مسترد کرتا ہے اور اپنے اس حق پر قائم ہے۔ انہوں نے کہا کہ عالمی قوانین ہر ملک کو پر امن مقاصد کے لیے جوہری توانائی سے متعلق سائنسی سرگرمیوں کی اجازت دیتے ہیں۔

انہوں نے باور کرایا کہ ایران جوہری ہتھیار حاصل کرنے کا خواہاں نہیں، نہ ماضی میں ایسا چاہا، نہ مستقبل میں ایسا ارادہ رکھتا ہے، کیونکہ یہ ایران کے عقیدے کے خلاف ہے، تاہم وہ، طبی، زرعی، صنعتی اور سائنسی مقاصد کے لیے افزودگی سے کبھی دستبردار نہیں ہو گا۔

(جاری ہے)

علاوہ ازیں ایرانی وزیر خارجہ عباس عراقچی نے کہا کہ ایران سفارتی حل کے لیے سنجیدہ ہے، مگر کسی بھی معاہدے میں تمام پابندیوں کے خاتمے اور یورینیم کی افزودگی کی اجازت کی شرط ہونی چاہیے۔

انہوں نے امریکا سے کسی معاہدے کے قریب ہونے کی خبروں پر کہا کہ وہ اس بارے میں یقین سے کچھ نہیں کہہ سکتے۔ ادھر ایرانی سپریم لیڈر کے مشیر علی شمخانی نے بیان میں کہا کہ امریکی صدور ایران کے جوہری ڈھانچے کو تباہ کرنے کے خواب دیکھتے رہے ہیں، مگر ایران کی سرخ لائنیں واضح ہیں اور اس کے دفاع مضبوط ہیں۔ انہوں نے کہا کہ بات چیت دباؤ یا دست برداری کو نہیں بلکہ ترقی، مفاد اور عزت کو فروغ دیتی ہے۔