عبرت ناک شکست کا پردہ فاش ہونے کا ڈر

بھارت کا فرانسیسی آڈیٹرز کو رافیل طیاروں تک رسائی دینے سے انکار ، امریکی جریدے کی رپورٹ

ہفتہ 31 مئی 2025 23:20

واشنگٹن (اُردو پوائنٹ اخبارتازہ ترین - اے پی پی۔ 31 مئی2025ء) بھارت نے آپریشن بنیان مرصوص کے دوران پاکستان کے ہاتھوں اپنی عبرت ناک شکست کا پردہ فاش ہونے کے ڈر سے فرانسیسی آڈیٹرز کو رافیل طیاروں تک رسائی دینے سے انکار کردیاہے۔کشمیرمیڈیاسروس کے مطابق امریکی جریدے''دی نیشنل انٹرسٹ ''نے اپنی ایک رپورٹ میں کہا ہے کہ بھارت کو خدشہ ہے کہ فرانسیسی آڈیٹرزکا اصل مقصد خراب کارکردگی کا الزام بھارتی فضائیہ پر ڈالنا ہے۔

امریکی جریدے نے اپنی رپورٹ میں کہا ہے کہ رافیل بنانے والی فرانسیسی کمپنی طیاروں میں کسی بھی ممکنہ خرابی کا جائزہ لینے کے لیے بھارت آنا چاہتی تھی۔رپورٹ میں کہاگیا کہ بھارت کو خدشہ ہے کہ فرانسیسی آڈیٹرز کااصل مقصد خراب کارکردگی کا الزام بھارتی فضائیہ پر ڈالنا ہے۔

(جاری ہے)

رپورٹ کے مطابق اس تمام صورتحال میں بھارت نے فرانسیسی آڈیٹرز کو رافیل طیاروں تک رسائی دینے سے صاف انکار کردیا ہے۔

حالیہ پاک بھارت تصادم کے دوران پاکستان نے بھارت کے فرانسیسی ساختہ رافیل طیاروں سمیت چھ طیارے مارگرائے تھے ۔ فرانسیسی فوج نے اپنے پہلے رد عمل میں کہا تھا کہ رافیل کی کارکردگی کے حوالے سے صورتحال کا بغور جائزہ لینے کے لیے بھارت سے براہ راست معلومات حاصل کرنے کی کوشش کر رہے ہیں۔عالمی خبر رساں ادارے کے مطابق فرانسیسی فوج کے ترجمان نے پریس بریفنگ میں بتایا تھا کہ لڑائی میں بہت سے طیاروں نے حصہ لیا تھا اس لیے بہت سے پہلوئوں کی تصدیق ہونا باقی ہے واقعے کی تفصیلات غیر یقینی ہیں۔

تاہم انہوں نے یہ بھی کہا کہ فرانس اس سے زیادہ سے زیادہ سیکھنے کا خواہشں مند ہے اگر واقعی رافیل طیارے مار گرائے گئے تو یہ دو دہائیوں کی آپریشنل سروس کا پہلا واقعہ ہوگا۔یاد رہے کہ بھارتی جارحیت میں مسجد کی شہادت اور معصوم شہریوں کی قیمتی جانوں کے نقصان پر پاک فضائیہ نے جوابا بھارت کے 6طیارے مار گرائے تھے۔یاد رہے کہ بھارت نے فرانس سے جدید 36رافیل طیارے خریدے تھے جن میں سے 3پاکستان نے حالیہ جنگ میں تباہ کردیے ہیں۔