بلوچستان نیشنل پارٹی ضلع کوئٹہ کے زیر اہتمام شہید نصیر لانگو کی برسی کے حوالے سے فقیر محمد روڈ میں پارٹی کے سینئر رہنما ایڈوکیٹ اقبال مینگل کی رہائشگاہ میں ایک پروقار تعزیتی ریفرنس کا انعقاد کیا گیا

جمعہ 30 مئی 2025 22:13

کوئٹہ (اُردو پوائنٹ اخبارتازہ ترین - آن لائن۔ 30 مئی2025ء) بلوچستان نیشنل پارٹی ضلع کوئٹہ کے زیر اہتمام شہید نصیر لانگو کی برسی کے حوالے سے فقیر محمد روڈ میں پارٹی کے سینئر رہنما ایڈوکیٹ اقبال مینگل کی رہائشگاہ میں ایک پروقار تعزیتی ریفرنس کا انعقاد کیا گیا۔ تقریب کی صدارت شہید کی تصویر سے کرائی گئی۔ مہمانان خاص پارٹی کے مرکزی فائنانس سیکریٹری و سابقہ ایم پی اے اختر حسین لانگو اور مرکزی لیبر سیکریٹری موسی بلوچ تھے جبکہ اعزازی مہمانان مرکزی ایگزیکٹیو کمیٹی کے ممبر اور ضلعی صدر بی این پی کوئٹہ غلام نبی مری اور ضلعی جنرل سیکریٹری جمال لانگو تھے۔

اس موقع پر ضلعی سینئر نائب صدر ملک محی الدین لہڑی، ضلعی سیکریٹری اطلاعات نسیم جاوید ہزارہ، ماما نصیر مینگل ، ایڈوکیٹ اقبال مینگل اور رضا جان شاہیزئی نے خطاب کیا۔

(جاری ہے)

مقررین نے شہید نصیر لانگو سمیت بلوچستان کے تمام شہدا کی قربانیوں کو زبردست خراج تحسین اور خراج عقیدت پیش کرتے ہوئے کہا کہ تعزیتی ریفرنس کا مقصد یہ ہے کہ ہم شہدا کی قربانیوں کو یاد کرنے کے ساتھ ہی ان کے نظریات اور سیاسی جدوجہد کو آگے بڑھانے کا عہد کرتے ہیں۔

بی این پی قومی راہشون سردار عطااللہ مینگل، میر غوث بخش بزنجو، نواب خیر بخش مری اور دیگر بلوچ اکابرین کے سیاسی سوچ اور فکر پر کاربند ایک سیاسی جماعت ہے جو آج ہم سردار اختر جان مینگل کی قیادت میں بلوچ قوم اور بلوچستان کے حقوق کے تحفظ اور واگ و اختیار کے حصول کی خاطر قائم رکھے ہوئے ہیں۔ یہ وہ جماعت ہے جس کی تاریخ میں بے شمار شہدا کا خون شامل ہے ہم شہدا کے وارث ہیں اور تعزیتی ریفرنس کے توسط سے ہم یہ عہد کرتے ہیں ہم قوم اور سرزمین کی دفاع اور حق کے لئے کسی بھی قربانی سے دریغ نہیں کریں گے۔ تقریب میں حاجی شفا مینگل، سلیم چند، دوست محمد سرپرہ، حاصل خان بنگلزئی، میر زعفران مینگل، نعمت مظہر، بشیر زہری، حمید لانگو، ابوبکر لانگو اور دیگر کثیر تعداد میں موجود تھے۔

Facebook Twitter Google + Share on Whatsapp

متعلقہ عنوان :

مزید قومی خبریں