Live Updates

عید الاضحیٰ پر پنجاب میں دفعہ 144 نافذ کردی گئی، متعدد پابندیاں عائد

صوبائی حکومت کی جانب سے عائد مختلف پابندیوں کا اطلاق جمعرات 5 جون سے بدھ 11 جون تک ہوگا

ساجد علی ہفتہ 31 مئی 2025 15:27

عید الاضحیٰ پر پنجاب میں دفعہ 144 نافذ کردی گئی، متعدد پابندیاں عائد

لاہور ( اُردو پوائنٹ اخبارتازہ ترین۔ 31 مئی 2025ء ) پنجاب حکومت نے عید الاضحیٰ کے موقع پر صوبے میں دفعہ 144 نافذ کردی۔ تفصیلات کے مطابق محکمہ داخلہ پنجاب نے اس حوالے سے احکامات جاری کر دیئے جن میں کہا گیا ہے کہ عوامی مقامات پر قربانی کے جانوروں کے سری پائے جلانے، دریاؤں، جھیلوں، نہروں اور ڈیمز میں تیراکی، نہانے اور کشتی رانی پر دفعہ 144 نافذ کی گئی ہے، جانوروں کے فضلے اور اوجھڑی کو مین ہول، نالیوں یا نہر میں پھینکنے، منظور شدہ مویشی منڈیوں کے علاوہ قربانی کے جانوروں کی خرید و فروخت پر بھی دفعہ 144 نافذ کی گئی ہے، اسلحہ اور گولہ بارود کی نمائش پر دفعہ 144 نافذ رہے گی، دفعہ کے تحت پابندیوں کا اطلاق جمعرات 5 جون سے بدھ 11 جون تک ہوگا۔

بتایا گیا ہے کہ سیکرٹری داخلہ پنجاب نے ضابطہ فوجداری 1898 کی دفعہ 144(6) کے تحت پابندی لگائی۔

(جاری ہے)

ترجمان محکمہ داخلہ پنجاب کا کہنا ہے کہ پابندیوں کا فیصلہ انسانی جانوں کے تحفظ، ماحول کی بہتری کیلئے کیا گیا، عید پر کسی بھی کالعدم تنظیم کو قربانی کی کھالیں اکٹھی کرنے کی اجازت نہیں ہوگی، پنجاب چیریٹی کمیشن سے رجسٹرڈ ادارے ہی صوبے میں قربانی کی کھالیں وصول کرسکیں گے۔

دوسری طرف وزیراعلیٰ خیبر پختونخواہ علی امین گنڈاپور نے عیدالاضحیٰ پر خصوصی انتظامات سے متعلق ہدایت نامہ جاری کردیا، وزیراعلیٰ خیبرپختونخوا نے متعلقہ حکام کو سکیورٹی پلان ترتیب دینے کی ہدایت کی ہے، ہدایت نامے میں کہا گیا ہے کہ ڈپٹی کمشنرز اور انتظامی افسران متعلقہ اسٹیشن پر موجود رہیں، منڈیوں میں جانوروں سے پھیلنے والی بیماریوں کی روک تھام کے لیے اقدامات کیے جائیں، ٹرانسپورٹ کے مقررہ کرایوں سے زیادہ وصول کرنے والوں کے خلاف سخت کارروائی عمل میں لائی جائے، عید خریداری کے لیے خواتین کے رش والے بازاروں میں خواتین پولیس اہلکار تعینات کی جائیں۔