Live Updates

18سال سے کم عمر کی شادی پابندی کا قانون قرآن وسنت کیخلاف ہے،مرکزی علماء کونسل

قرآن و سنت کے احکامات کو نظر انداز کرکے قانون سازی غیر آئینی اور آئین پاکستان کی روح کے خلاف ہے تمام دینی طبقات مولانا فضل الرحمن کے موقف کی تائید کرتے ہیں او رتمام دینی جماعتیں ان کے شانہ بشانہ ہیں

پیر 2 جون 2025 13:06

18سال سے کم عمر کی شادی پابندی کا قانون قرآن وسنت کیخلاف ہے،مرکزی علماء ..

مکوآنہ (اُردو پوائنٹ اخبارتازہ ترین - این این آئی۔ 02 جون2025ء)مرکزی علماء کونسل پاکستان نے 18سال سے کم عمر کی شادی پر پابندی کا قانون قرآن و سنت کے خلاف قرار دے کر مسترد کردیا ہے جبکہ اس متنازع بل کو اسلامی نظریاتی کونسل بھی قرآن و سنت کے خلاف قرار دے کر مسترد کرچکی ہے۔ قرآن و سنت کے احکامات کو نظر انداز کرکے قانون سازی غیر آئینی اور آئین پاکستان کی روح کے خلاف ہے۔

حکومت قرآن وسنت اور آئین پاکستان سے متصادم قانون سازی ہر گز نہ کرے،جس سے اسلامی تعلیمات کا مذاق اڑایا جائے۔ حکومت غیرشرعی بل واپس لے۔چیئرمین مرکزی علماء کونسل پاکستان صاحبزادہ زاہد محمود قاسمی، جنرل سیکرٹری علامہ شاہ نواز فاروقی، پیر جی خالد محمود قاسمی، علامہ شبیر احمد عثمانی، سید سمیع اللہ حسینی،علامہ حفیظ الرحمن کشمیری، میاں محمد طیب ایڈووکیٹ، صدر پنجاب مولانا مشتاق لاہوری، صدر بلوچستان مفتی عبدالوحید،صدر گلگت بلتستان قاری وزیر علی، صدر سندھ مولانا عبدالماجد فاروقی، صدر آزاد کشمیرمولانا ممتاز الحق قاسمی،صدر خیبر پختونخواہ مولانا بلال نے اپنی مشترکہ پریس ریلیز میں کہا ہے کہ 18سال سے کم عمری کی شادی کو زیادتی، چائلڈ ابیوز قراردے کر اس پر سزائیں مقرر کرنا اسلامی احکام سے مطابقت نہیں رکھتیں۔

(جاری ہے)

مجموعی طور پر پاکستان میں موجود تمام مکاتب فکر کے علماء اور رہنماؤں نے اس بل کو مسترد کردیا ہے۔کم عمر شادی سے متعلق انسانی حقوق کمیشن کی رپورٹ کو مسترد کرتے ہیں۔ اسلام سب سے زیادہ بچوں اور بچیوں کو ان کے حقوق دیتا ہے اور بچوں کے تحفظ کا ضامن ہے۔ پارلیمنٹ میں موجود تمام دینی طبقات کی آواز مولانا فضل الرحمن کے موقف کی تائید کرتے ہیں او رتمام دینی جماعتیں ان کے شانہ بشانہ ہیں۔

آئینی ادارہ اسلامی نظریاتی کونسل نے پارلیمنٹ میں کم عمر شادی کے بل کی منظوری کے بعد اور صدر پاکستان کے دستخط سے پہلے اس بل کو غیر اسلامی قراردیا ہے۔ اس بل کو قرآن و سنت کی تعلیمات اور آئین پاکستان سے متصادم قرار دیا ہے۔اس کے باوجود حکومت نے اس غیر اسلامی بل کو پاس کیا۔ہم حکومت سے مطالبہ کرتے ہیں کہ فوری طورپر اس بل کو واپس لیا جائے۔