موٹر سائیکل کیوں گاڑی سے ٹکرائی؟، بااثرشخص کا فیملی کے سامنے شہری پر تشدد، گارڈ اور ڈرائیور گرفتار

موٹر سائیکل سوار شخص بہنوں کے ساتھ جا رہا تھا اچانک موٹر سائیکل سے کار کو ٹکر لگی بااثر شخص طیش میں آگیا اور موٹر سائیکل سوار پر تشدد کرنا شروع کر دیا، موٹر سائیکل سوار کی بہنیں منتیں اور ہاتھ جوڑ کرمعافیاں مانگتی رہیں لیکن وہ مسلسل تشدد کرتا رہا، مقدمہ عینی شاہد محمد اسلم کی مدعیت میں گزری تھانے میں درج کیا گیا

فیصل علوی پیر 2 جون 2025 15:52

موٹر سائیکل کیوں گاڑی سے ٹکرائی؟، بااثرشخص کا فیملی کے سامنے شہری پر ..

کراچی(اردوپوائنٹ اخبار تازہ ترین۔02 جون 2025)کراچی میں بااثر کار سوارشخص نے موٹر سائیکل سوار کوفیملی کے سامنے تشدد کا نشانہ بنا ڈالا، واقعہ ڈیفنس کے فیز 6 کے علاقے خیابان اتحاد کمرشل میں پیش آیا جس کی ویڈیو سوشل میڈیا پر وائرل ہوگئی ہے، پولیس نے ڈیفنس خیابان اتحاد میں شہری پر تشدد کے واقعے کامقدمہ درج کرلیا ہے اور گارڈ اور ڈرائیور کو گرفتار کرلیاگیا ہے جبکہ بااثر شہری تاحال گرفتار نہیں ہوسکا ،بتایا گیا ہے کہ موٹر سائیکل سوار شخص بہنوں کے ساتھ جا رہا تھا اچانک موٹر سائیکل سے کار کو ٹکر لگی جس کے بعد بااثر شخص نے موٹر سائیکل سوار شخص پر تشدد کرنا شروع کر دیا۔

اس دوران موٹر سائیکل سوار کی بہنیں کار سوار شخص کی منتیں کرتی رہیں لیکن کار سوار شخص نے منت سماجت پر بھی موٹر سائیکل سوار کو نہیں چھوڑا۔

(جاری ہے)

خواتین ہاتھ جوڑ کر معافیاں مانگتی رہیں مگر سلمان فاروقی نوجوان پرتشدد کرتا رہا۔بے بس خواتین ہاتھ جوڑے التجائیں کرتی رہیں مگر بااثر شہری ٹس سے مس نہ ہوا۔پولیس کے مطابق کار سوار شخص کی گاڑی کے نمبر سے اس کی شناخت کی گئی ہے۔

پولیس نے مزید بتایا کہ کار سوار شخص کی شناخت سلمان فاروقی کے نام سے ہوئی ہے تاہم اس کی تلاش جاری ہے۔ پولیس کا یہ بھی کہنا ہے کہ تاحال متاثرہ فیملی نے ابھی تک پولیس کو شکایت نہیں کی ہے۔ڈی آئی جی ساوتھ نے تصدیق کی ہے کہ ملزم کی گاڑی کو قبضے میں لے لیا گیا ہے جبکہ تشدد میں ملوث مرکزی شخص کی شناخت بھی مکمل ہو چکی ہے۔مقدمہ عینی شاہد محمد اسلم کی مدعیت میں گزری تھانے میں درج کیا گیا جس میں ملزم سلمان فاروقی کو نامزد کیا گیا ہے۔

مقدمے کے متن کے مطابق ملزم نے موٹرسائیکل سوار ایک شہری پر حملہ کر کے اسے شدید تشدد کا نشانہ بنایا۔ڈی آئی جی ساوتھ کا کہنا ہے کہ سلمان فاروقی کی گرفتاری کیلئے چھاپے مارے جا رہے ہیں اور قانون کے مطابق سخت کارروائی عمل میں لائی جائے گی۔پولیس کا کہنا ہے کہ متاثرہ فیملی سے بھی مسلسل رابطے کی کوشش کی جا رہی ہے تاکہ مزید معلومات حاصل کی جا سکیں۔ڈی آئی جی کامزید کہنا تھاکہ پولیس اس معاملے کو انتہائی سنجیدگی سے لے رہی ہے اور ملزم سمیت اس کے تمام ساتھیوں کے خلاف ایف آئی آر درج کی جا رہی ہے۔ قانون نافذ کرنے والے ادارے پرعزم ہیں کہ کسی بااثر شخص کو قانون سے بالاتر نہیں سمجھا جائے گا اور متاثرہ شہری کو مکمل انصاف فراہم کیا جائے گا۔