Live Updates

ایف بی آر کی بڑی کامیابی، اسلام آباد ہائیکورٹ نے 36 ارب روپے سے زائد مالیت کے زیر التواء مقدمات نمٹا دئیے

پیر 2 جون 2025 19:00

اسلام آباد (اُردو پوائنٹ اخبارتازہ ترین - اے پی پی۔ 02 جون2025ء) وزیراعظم کی خصوصی دلچسپی اور سخت ہدایات کی بدولت ایف بی آر نے اپنے قانونی نظام میں نمایاں بہتری لاتے ہوئے زیر التواء مقدمات میں بڑی کامیابی حاصل کر لی جس کے نتیجے میں اسلام آباد ہائیکورٹ نے گزشتہ ہفتے ایف بی آر کے حق میں فیصلے دیتے ہوئے مجموعی طور پر 36.14 ارب روپے مالیت کے مقدمات نمٹا دیئے۔

وزارت خزانہ کی طرف سے جاری بیان کے مطابق وزیراعظم کی ہدایات پر ایف بی آر نے اسلام آباد ہائی کورٹ میں زیر التوا کیسز کی بھرپور پیروی کی جس کے نتیجے میں گزشتہ ہفتے ایف بی آر کے حق میں فیصلے دیتے ہوئے معزز عدالت نے مجموعی طور پر 36.14 ارب روپے مالیت کے مقدمات نمٹا دیئے۔کھربوں روپے کا ریونیو جو عرصہ دراز سے مختلف مقدمات میں پھنس کر رہ گیا تھا اور قومی محصولات کی وصولی میں بڑی رکاوٹ بنا ہوا تھا، وزیراعظم کی خصوصی ہدایات پر قانونی کارروائیوں اور نمائندگی کے لیے ایک مربوط حکمت عملی وضع کی گئی جس کی بدولت ایف بی آر کو نمایاں کامیابیاں ملنے کا سلسلہ شروع ہوا۔

(جاری ہے)

گزشتہ ہفتے کی نمایاں کامیابیوں میں تین بڑے ٹیکس مقدمات شامل ہیں جن میں بحریہ ٹائون (پرائیویٹ) لمیٹڈ کا مقدمہ سب سے اہم ہے جس میں اسلام آباد ہائی کورٹ نے 26.446 ارب روپے کی ریکوری کا فیصلہ ایف بی آر کے حق میں برقرار رکھا ہے۔ یہ مقدمات گزشتہ ڈھائی سال سے مختلف اپیلٹ فورمز پر زیر التواء تھے۔اسی طرح دو دیگر کارپوریٹ مقدمات جن کی مجموعی مالیت 9.7 ارب روپے ہے، ان میں بھی معزز عدالت نے ایف بی آر کے موقف کو تسلیم کیا۔یہ کامیابیاں وزیر اعظم پاکستان کی قیادت میں حکومت کے عزم اور معاشی اصلاحات کی کامیابی کا منہ بولتا ثبوت ہیں۔