رکن قومی اسمبلی ڈاکٹر مہیش کمار ملانی کی زیر صدارت کمیٹی برائے نیشنل ہیلتھ سروسز، ریگولیشنز اینڈ کوآرڈینیشن کا اجلاس

اسلام آباد (اُردو پوائنٹ اخبارتازہ ترین - اے پی پی۔ 02 جون2025ء) کمیٹی برائے نیشنل ہیلتھ سروسز، ریگولیشنز اینڈ کوآرڈینیشن (این ایچ ایس آر اینڈ سی) کا اجلاس رکن قومی اسمبلی ڈاکٹر مہیش کمار ملانی کی زیر صدارت پارلیمنٹ ہاؤس اسلام آباد کے کمیٹی روم نمبر 7 میں منعقد ہوا۔کمیٹی نے نجی ہسپتالوں کی ریگولیشن، صحت کی دیکھ بھال کے معیارات اور صحت کے اہم اداروں کی فعالیت سمیت متعدد موضوعات پر جامع تبادلہ خیال کیا۔

کمیٹی نے اسلام آباد ہیلتھ کیئر ریگولیٹری اتھارٹی (آئی ایچ آر اے) کی پیش رفت کا جائزہ لیا اور نجی ہسپتالوں کی نگرانی کے لئے مضبوط میکانزم کی ضرورت پر زور دیا۔ ممبران نے قیمتوں کے تعین کے غیر منظم طریقوں پر تشویش کا اظہار کیا اور صوبائی ہیلتھ کیئر کمیشنوں، خاص طور پر پنجاب کے ساتھ تعاون پر زور دیا تاکہ قیمتوں کا موثر فریم ورک قائم کیا جا سکے۔

(جاری ہے)

آئی ایچ آر اے کو نجی ہسپتالوں کی مکمل فہرست، قواعد و ضوابط کی تفصیلات اور مخصوص معاملات میں انکوائریوں کے بارے میں تازہ ترین معلومات فراہم کرنے کی ہدایت کی گئی تھی۔ ایم این اے ڈاکٹر امجد علی خان کی سربراہی میں ایک ذیلی کمیٹی تشکیل دی گئی جس میں سبین غوری، ڈاکٹر شازیہ ثوبیہ اسلم سومرو اور ڈاکٹر شائستہ خان ایم این اے شامل تھیں جو آئی ایچ آر اے کے ریگولیٹری فریم ورک میں خامیوں کا جائزہ لیں گی اور فلاحی خدمات کی ذمہ داریوں کی تعمیل کو یقینی بنانے کے لئے نجی اسپتالوں کے ساتھ معاہدوں کی نگرانی کریں گی۔

نیشنل انسٹی ٹیوٹ آف ری ہیبلیٹیشن میڈیسن (این آئی آر ایم) نے اپنی خدمات اور چیلنجوں کا جائزہ پیش کیا، جس میں انفراسٹرکچر اور وسائل کو بہتر بنانے کی ضرورت پر روشنی ڈالی گئی۔ ممبران نے انسٹی ٹیوٹ کے تعاون کی تعریف کی لیکن حفظان صحت ، ڈاکٹروں کی حاضری اور مریضوں کی دیکھ بھال کے بارے میں تشویش کا اظہار کیا۔کمیٹی نے عملے کی کمی کو دور کرنے، سہولیات کی صفائی کو بہتر بنانے اور طبی وسائل کی منصفانہ تقسیم کو یقینی بنانے کے لئے اقدامات کی سفارش کی۔

قانون سازی کے معاملات پر کمیٹی نے "فارمیسی (ترمیمی) بل، 2024" (ایم این اے جناب عبدالقادر پٹیل کی طرف سے پیش کردہ) پر بحث انچارج وزیر کی غیر موجودگی کا حوالہ دیتے ہوئے ملتوی کردی۔۔ اجلاس صحت کی دیکھ بھال کی اصلاحات کو آگے بڑھانے اور اس بات کو یقینی بنانے کے عزم کے ساتھ اختتام پذیر ہوا کہ صحت عامہ کی خدمات دیکھ بھال اور ریگولیشن کے اعلی ترین معیارات پر پورا اترتی ہیں۔

اجلاس میں اراکین قومی اسمبلی ڈاکٹر شازیہ ثوبیہ اسلم سومرو، سبین غوری، فرح ناز اکبر، ڈاکٹر شائستہ خان، ڈاکٹر درشن، ڈاکٹر نخت شکیل خان، عالیہ کامران، شہرام خان، ڈاکٹر امجد علی خان، شبیر علی قریشی، عبدالقادر پٹیل جبکہ عظیم الدین زاہد لکھوی اور ڈاکٹر نثار احمد نے شرکت کی۔ ایم این اے نے ورچوئل طور پر شرکت کی۔ وزیر این ایچ ایس آر اینڈ سی، سیکرٹری این ایچ ایس آر اینڈ سی اور این ایچ ایس آر اینڈ سی کے سینئر افسران نے شرکت کی۔