بھارت کی معاشی ترقی سے متعلق مودی سرکار کے دعوے کھوکھلے ثابت ہو گئے

منگل 3 جون 2025 12:13

نئی دلی (اُردو پوائنٹ اخبارتازہ ترین - اے پی پی۔ 03 جون2025ء) بھارتی معیشت اور جی ڈی پی کے حوالے سے مودی سرکار کے دعوے کھوکھلے ثابت ہو گئے۔ بھارتی ماہر معیشت پروفیسر ارون کمار نے معیشت کے اندرونی مسائل اورمودی حکومت کے جھوٹے دعوئوں کو بے نقاب کیا ہے۔کشمیرمیڈیاسروس کے مطابق جواہر لال نہرو یونیورسٹی کے معاشیات کے سابق پروفیسر ارون کمار نے کرن تھاپر کے ساتھ انٹرویو میں بھارتی معیشت کی موجودہ صورتحال کے بارے میں خدشات کا اظہار کیا ۔

انہوں نے معیشت سے متعلق مودی حکومت کے دعوئوں پر تنقید کرتے ہوئے کہاکہ جی ڈی پی کے اعدادوشمار کو بڑھا چڑھا کر پیش کیاجارہاہے جبکہ حقائق اس کے برعکس ہیں۔ انہوں نے کہاکہ مودی سرکار کے مطابق بھارت کا جی ڈی پی جاپان کے برابر یا اس سے آگے نکل رہا ہے جبکہ بھارتی عوام کی فی کس آمدنی کو مدنظر رکھا جائے تو اب بھی جاپان کے مقابلے میں بھارت تیرہ گنا پیچھے ہے۔

(جاری ہے)

ارون کمار نے کہاکہ فی کس آمدنی کسی بھی ملک میں عوام کی خوشحالی اور معیارِ زندگی کی اصل عکاسی کرتی ہے۔ حکومتی اعدادوشمار میں ملکی معیشت کے حجم کو بڑھا چڑھا کر پیش کیاگیا ہے ۔ انہوں نے کہاکہ بھارت میں بے روزگاری کی شرح سرکاری اعدادوشمار میں کم دکھائی جاتی ہے اور بین الاقوامی ادارے بھارت میں بے روزگاری کی اصل شرح کہیں زیادہ بتاتے ہیں۔

ارون کمار کے مطابق بھارت میں لیبر فورس کی شراکت کی شرح عالمی معیار کے مقابلے میں بہت کم ہے،ٹیکنالوجی اور تحقیق و ترقی کے میدان میں بھارت ابھی بھی ترقی یافتہ ممالک سے کوسوں دور ہے۔ارون کمارنے کہاکہ محض جی ڈی پی کا بڑھ جانا ترقی کی علامت نہیں، حقیقی ترقی کا انحصار صحت، تعلیم اور سماجی بہبود پر ہے۔انہوں نے مودی حکومت کے دعوئوں کو تسلیم کرنے سے انکار کرتے ہوئے واضح کیاکہ بھارت کی معاشی ترقی کی شرح حقیقتاً صرف 2 فیصد ہے، جبکہ مودی سرکار معیشت کی ترقی 6.5 فیصد بتاتی ہے۔ ارون کمارنے کہاکہ بھارتی معیشت سے متعلق سرکاری کے دعوے مبالغہ آرائی پر مبنی ہیں۔