Live Updates

آئندہ مالی سال کے دوران مہنگائی کا نیا طوفان آنے کا خدشہ

ستمبر 2025 کے بعد مہنگائی دھماکے سے بڑھے گی، تیار ہو جائیں، سابق وفاقی وزیر نے خبردار کر دیا

محمد علی منگل 3 جون 2025 18:48

لاہور (اُردو پوائنٹ اخبارتازہ ترین۔ 03 جون2025ء) آئندہ مالی سال کے دوران مہنگائی کا نیا طوفان آنے کا خدشہ، سابق وفاقی وزیر نے خبردار کر دیا کہ ستمبر 2025 کے بعد مہنگائی دھماکے سے بڑھے گی، تیار ہو جائیں۔ تفصیلات کے مطابق سابق وفاقی وزیر دانیال عزیز نے مہنگائی کا نیا طوفان آنے کا خدشہ ظاہر کرتے ہوئے انکشاف کیا ہے کہ "'پاکستان کے بینکوں نے ستمبر 2024 سے اب تک پرائیویٹ سیکٹر کریڈٹ کی صورت میں مارکیٹ میں 1.08 ٹریلین روپے ڈالے ہیں۔

اگر ماضی کوئی پیمانہ ہے تو ستمبر 2025 کے بعد مہنگائی دھماکے سے بڑھے گی۔ تیار ہو جائیں، تیار ہو جائیں، تیار ہو جائیں"۔ دوسری جانب حکومت کی جانب سے پیٹرولیم مصنوعات پر کاربن لیوی عائد کیے جانے کا امکان ہے، جس کے نتیجے میں قیمتوں میں اضافے کا خدشہ ہے۔

(جاری ہے)

آئندہ مالی سال 2025-26 کے وفاقی بجٹ میں حکومت کی جانب سے پیٹرولیم مصنوعات پر ڈھائی روپے فی لیٹر کاربن لیوی عائد کرنے کا امکان ہے۔

ذرائع کا کہنا ہے کہ دوسرے سال کاربن لیوی بڑھا کر 5 روپے فی لیٹر عائد کر دی جائے گی۔ ذرائع کے مطابق آئندہ مالی سال 26-2025 میں کاربن لیوی سے 45 ارب روپے تک حاصل ہو سکیں گے جب کہ مالی سال 2027 کے دوران کاربن لیوی کی آمدن دْگنی ہو جائے گی۔ کاربن لیوی عائد ہونے سے پیٹرولیم مصنوعات کی قیمتیں بڑھنے کا خدشہ ہے۔ ذرائع کا کہنا ہے کہ پیٹرول اور ڈیزل پر کاربن لیوی پی ڈی لیوی کے ساتھ ہی عائد کی جائے گی۔ مٹی کے تیل اور لائٹ ڈیزل آئل پر کاربن لیوی عائد نہیں ہو گی۔ آئندہ بجٹ میں کاربن لیوی کے لیے الگ سے قانون سازی نہیں ہو گی۔ حکام کے مطابق فی لٹر ڈھائی روپے کاربن لیوی کو گرین بجٹنگ کے لیے استعمال کیا جائے گا۔