حکومت کا کراچی میں سندھ کا پہلا سپیشل ٹیکنالوجی زون قائم کرنے کا اعلان

ٹیکنالوجی زون میں 8سے زائد بڑے ملکی وغیرملکی سرمایہ کاراداروں نیکام کرنے کیلئے گہری دلچسپی ظاہر کردی ہے، قاسم نوید

منگل 3 جون 2025 21:00

کراچی(اُردو پوائنٹ اخبارتازہ ترین - این این آئی۔ 03 جون2025ء)وزیر اعلیٰ سندھ کے معاون خصوصی برائے سرمایہ کاری اور پبلک پرائیویٹ پارٹنر شپ قاسم نوید قمر نے کہا ہے کہ سلیکون ویلی کے طرز پر سندھ کا پہلا اسپیشل ٹیکنالوجی زون 500ایکڑ اراضی پر گڈاپ میں کراچی ایجوکیشن سٹی میں تعمیر کرنے کی منظوری حاصل کرلی گئی ہے اور اس سلسلے میں پاکستان اسپیشل ٹیکنالوجی زون اتھارٹی نے نوٹیفیکیشن بھی جاری کردیا ہے۔

معاون خصوصی قاسم نوید قمر نے کہاکہ یہ سپیشل ٹیکنالوجی زون اکیڈیمیا اور انڈسٹری کے الحاق کا بہترین سنگم ثابت ہوگا۔انہوں نے کہا کہ اس اسپیشل ٹیکنالوجی زون کی اہمیت کا اندازہ اس بات سے لگایا جاسکتا ہے کہ 8سے زائد بڑے ملکی و غیر ملکی سرمایہ کار اداروں نے اس زون میں کام کرنے کیلئے گہری دلچسپی ظاہر کردی ہے۔

(جاری ہے)

سید قاسم نوید قمر نے کہاکہ یہ سپیشل ٹیکنالوجی زون سلیکون ویلی کے طرز پر تعمیر کیا جائے گا اور یہ زون اسمارٹ مینوفیکچرنگ کا ایک ایسا مرکز ہوگا جس میں آٹو میشن، ایڈوانس مینو فیکچرنگ، کلاڈ اینڈ ایج کمپیوٹنگ، سائبرسیکیورٹی، ہیلتھ ٹیکنالوجی ، ایگری ٹیکنالوجی، بلاک چین، فائیو جی ہائپراسپیڈ، کلین انرجی اور دیگر جدید ترین ٹیکنالوجی کے ادارے قائم ہوں گے۔

انہوں نے کہاکہ اس سپیشل ٹیکنالوجی زون سے صوبے میں جدید ترین ٹیکنالوجی اور تعلیم کو فروغ ملے گا اور نوجوانوں کیلئے تعلیم اور روزگار کے حصول کے وسیع مواقع پیدا ہوں گے۔قاسم نوید قمر نے کہا کہ سپیشل ٹیکنالوجی زون کے قیام کیلئے روڈ میپ پر مبنی ماسٹر پلان پر ترقیاتی کام تیزی سے جاری ہے اور یہ زون جلد ہی فعال ہوکر صوبے میں تعلیم، جدید ترین ٹیکنالوجی اور روزگار حاصل کرنے کے مواقع کا سبب بنے گا۔